Funcionario di FIFA a reuni cu Ministro Gerlien Croes

ORANJESTAD (AAN): Recientemente na oficina di Ministro di Deporte, Gerlien Croes, a tuma lugar reunion cu un funcionario di FIFA kende tabata di bishita na Aruba.

   Ta trata aki di Amiel Mohammed, kende a presenta hunto cu Randolf Lacle y demas representantenan di Arubaanse Voetbal Bond (AVB) tambe na e reunion.

   Manera DIARIO a trece dilanti caba recien, Aruba ta den proceso di cuminza cu construccion di 7 veld di turf, y alavez ya ta ehecutando e proyecto di Mini FIFA Turf Arena.

   E funcionario di FIFA a yega Aruba pa bishita y mira e desaroyonan, y e ta bishitando e veldnan tambe, y ta combersa cu e dirigente di e clubnan di futbol.  Sigur futbol di Aruba ta hayando su empuhe necesario den 2026.