Frans Ponson ta cuestiona cu polis ta puntra hende si a paga number y seguro di auto

Control ta tarea di DIMP y no di polis

ORANJESTAD (AAN) Segun Frans Ponson, presidente di Comerciantenan Uni Aruba (CUA), e ta puntra pakico pa Gobierno tur cos mester ta complica. Esun cu mester cobra pueblo e impuesto riba number di auto ta DIMP. Esey no ta trabao di polis.

   Ponson a bisa cu ta den noticia mes el a wak cu no tin number di auto mas. “Por compronde cu algo por pasa, pero no cu pa tanto luna no tin plachi number, esey a bay leu, y e cosnan aki no tin sentido, y sector priva tin cu handle esaki”, el a bisa.

   “Mi ta kere cu mi tin cu yama mi amiga stima Luenne, puntre si ta DIMP no kier of gobierno no kier, pa e ora ey nos bisa pueblo ‘shonnan, esaki ta un problema di DIMP’ of, ‘Gobierno no kier pa fix e asunto aki”.

   Ponson a expresa cu ora polis puntra bo, esaki ta burocracia atrobe, y a comenta cu den e gremio di comerciantenan tin hende cu por traha un proyecto pa yuda gobierno cu un sistema funcional. Nan por bin cu un destaho publico mañan y fix e asunto aki inter connect. “E mester ta cu unda mi ta mi ta bay, carga un mashin aworaki, paga mi number di auto, y cla!” segun Frans Ponson.

   Ponson a bisa cu mester por cambia e ley, pero e no por wordo haci mañan, no obstante tin 20 aña papiando di e tema aki.  El a bisa cu tin hopi hende na Aruba cu un auto sin seguro a bin dal nan auto, y te ainda nan no a cobra nan placa. “Ami ta lanta mi dede pasobra ami ta un, cu un auto sin seguro a dal mi y nan no a paga mi. Ami mes mester a pag’e. Pero no tur hende por afford”, señor Ponson a comenta.

El a agrega cu ta un ley cu mester wordo traha, e no por bisa cu e ta bay pasa mañan, pero tin cu hacie. “Pasobra nos tin cu cuida e pueblo cu tin un debe na banco, pasobra un auto sin seguro a dal’e y awe tin cu paga no solamente e banco pero tambe un hende pa haci e trabao”, Frans Ponson a señala.