Fraccion di MEP ta pidi reunion publico pa debati cu Gobierno riba futuro di refineria

Cambionan na Venezuela ta brinda oportunidadnan nobo

ORANJESTAD (AAN): Fraccion di MEP a pidi un reunion cu gobierno riba e futuro riba e refineria di Aruba, mirando e cambionan cu ta tumando lugar na Venezuela. “Ami ta un di esnan cu ta di opinion cu pa Aruba, e industria petrolero ta ‘gepasseerd station’. Principalmente door di e sancionnan Mericano riba e industria petrolero di Venezuela.

Pero cu e cambionan cu ta vislumbra na Venezuela, specialmente pa loke ta e sancionnan Mericano, y e interesnan grandi di Merca, esaki ta habri oportunidadnan nobo pa Aruba.

“Mi opinion ta cu tanten cu ta un ta un industria limpi cu ta cumpli cu standardnan di medio ambiente y cu ta crea empleo pa nos hendenan, ta nos deber moral ta explora e posibilidad”, lider di MEP Evelyn Wever-Croes a duna di conoce. Conseheronan local ta consehando pa gobierno pone un pausa riba e planes di desmantelacion. Tambe nan a indica cu e facilidadnan na Aruba por wordo renoba. Aruba tin tur cos pa e industria aki. Ta capital tin mester. Pues e no ta imposibel.

Fraccion di MEP kier sa si a haci un estudio pa compara e beneficionan economico pa Aruba di desmantelacion compara cu si Aruba ta “open back for business” pa e industria petrolero. Te ainda Gobierno no a haci e estudio ey. Fraccion di MEP ta conseha gobierno di Aruba pa tuma contacto cu e gobierno y companianan Mericano, y bisa cu Aruba ta open for business.

Fraccion di MEP ta spera cu e reunion wordo yama riba termino corto, pa Aruba no perde e oportunidad.