Fraccion di MEP ta identifica 3 area di preocupacion cu nos hobennan tin

Parlamentario Evelyn Wever-Croes:

*Ta spera cu Gobierno uza placa di surplus pa yuda nan 

ORANJESTAD (AAN): "Nos hubentud mester haya mas oportunidad pa realisa nan propio soñonan y ta ciudadanonan productivo aki riba nan mesun pais. Maneho di gobiernonan mester enfoca mas riba e manera con nan ta bay logra esaki pa nan," segun e mensahe di Parlamentario di Fraccion di MEP, Evelyn Wever-Croes den su disertacion siman pasa den reunion publico den Parlamento. 

Segun e Parlamentario, e ta sinti cu tin un miedo den nos hobennan pa entre otro expande nan famia, pa nan establece nan mes, y pa inverti. El a menciona 3 area cu a keda identifica y ta spera cu Gobierno lo inverti e extra surplus ainda den e 3 areanan aki. 

E prome, nos hobennan ta desea di haya nan propio vivienda. Gobiernoy Wever-Croes a  aloca casi 20 miyon florin den e presupuesto 2025 pa asina FCCA por cuminsa mesora traha 100 cas. Sinembargo, e parlamentario a enfatisa, e gobierno actual, Gabinete AVP-Futuro, riba nan prome dia di trabou a scrap e 20 miyon for di e presupuesto pa vivienda, y awo e 20 miyon aki ta bay pa paga debe pa motibo cu el a bira un extra surplus. Segun Parlamentario Wever-Croes, cu si a uza e placa aki, cu ta un fiansa y no un regalo, pa FCCA  traha vivienda, pa otro aña 100 famia por a haya yabi pa nan biba den nan cas. Parlamentario Wever-Croes enfaticamente a bisa cu esaki ta un decision ekiboca di e Minister di Finansa Geoffrey Wever di e gobierno actual.    

E di dos, nos hobennan kier un trabou cu nan ta haya interesante y ta sinti comfortable cu ne. Nos economia, segun e parlamentario, ta hopi ‘eenzijdig’ y ya ta wardando riba difersificacion di economia ya pa cinco Aña caba. No tin indicator cu ta mustra con hopi economia a difersica, y cuanto trabou nobo a crea pa nos hobennan, trabounan cu nan ta sinti comfortabel cu ne. 

E di tres, gastonan cu nan tin. Den campaña electoral ultimo, tur partido politico a papia di entre otro e ‘creche toeslag’. Durante Gabinete Wever-Croes II, ex Minister Rocco Tjon a traha riba un proyecto pa diferente sistema di toeslag. Asina tambe tin varios otro cos cu gobieno por haci pa kita peso di nos hobennan. Parlamentario Wever-Croes a expresa cu awo Aruba tin placa, a resta extra placa e aña aki cu ta bay perdi, of den inversion por ta, of pa paga debe, pero no ta bay den e ser humano cu tin mester di dje, nos hobennan cu kier propio cas y expande nan famia. 

“Ban duna nos hobennan speransa bek. Ban yuda nan pa nan por crea e famia, nan hogar cu nan ta desea pa asina nan tambe por duna di nan parti pa hiba Aruba dilanti”, Parlamentario Wever-Croes a expresa.