For di October 2021 tin un investigacion administrativo tumando lugar na Aruba Huis

Premier Wever-Croes

ORANJESTAD (AAN):   Prome Minister Evelyn Wever-Croes a duna di conoce cu aña pasa na momento cu el a compronde cu tin cosnan cu a pasa na Aruba Huis cu probabelmente no tabata bon, mesora el  a pidi Centrale Accountant Dienst pa haci un investigacion.

            E mandatario a sigui bisa cu esey tabata na October 2021. Aña a bolter y a amplia e investigacion y a manda mas hende di Departamento di Recursonan Humano y encarga cu Finanzas pa Aruba Huis pa cualkier cos cu por a wordo constata cu no ta bon pa coregi esey inmediatamente.

            Wever-Croes a indica tambe cu ta trata di un investigacion administrativo cu CAD ta haci cu bukinan pa mira si tur cos a tuma lugar corectamente of no.

            A base di esey a introduci algun cambio caba na Aruba y esakinan ta pa percura cu tur cos ta cana bon den futuro, a remarca.

            E rapport riba su mes y e investigacion den su totalidad no ta cla ainda y manera e mandatario a informa Parlamento, tanten cu esaki no ta cla, e no por ni comparti'e ni duna mucho informacion di dje pa no daña e investigacion, cual mester wordo finalisa corectamente pa tuma e pasonan necesario.

            Mientrastanto, a bisa, for di Januari no tabata tin director na Aruba Huis y pesey a acerca un persona cu tin conocimento den e area social y di enseñanza, esta Glenda Hernandez, pa guia temporalmente Aruba Huis, Prome Minister a señala.

            Pa loke ta e investigacion, a expresa, cu asina cu tin mas informacion lo comparti esaki cu comunidad. Mester warda riba e rapport di CAD y e conseho di Departamento di Recurso Humano keda cla, a bisa.

            Ora cu Guilfred Besaril bin bek Aruba otro luna, Ady Thijsen lo ta e persona cu lo keda encarga cu e funcion di Minister Plenipotenciario banda cu esun di Representante di Union Europeo.

            Prome Minister tambe a remarca relaciona c'un pregunta di prensa, cu Guilfred Besaril no lo por bay den Parlamento. Parlamento ta completo caba.