Fiscal a exigi castigo combina pa homber sospecha di a haci actonan inmoral cu yiu muher di su pareha

Aunke cu Instituto Forence no a haya prueba

ORANJESTAD (AAN): Diahuebs mainta e homber Colombiano biba na Aruba M. (44), tabata para riba cu e no a haci nada. Fiscal a exigi 180 dia di prison di cual 75 dia ta condicional cu 2 aña di prison.

ACUSACION

E acusacion cu Fiscal a presenta contra M. ta cu riba 6 Februari 2025, el a haci actonan inmoral (mishi na e dama hoben A. su pia y su parti intimo) y a masturba riba e laken di e dama hoben A. 

Den sala di Corte tabata presente e mama di e victima, kende ta pareha di M., y e victima a presenta mas laat. Abogado mr. Dijkhof a representa e victima A. pa haci demanda di daño inmaterial. Den e articulo aki ta publica tratamento di e caso y e exigencia di Fiscal. Den un otro articulo ta publica e defensa di abogado mr. Mohamed. Asina lectornan tin un bista bon cla di e caso.

ACTONAN INMORAL

Hues a bisa M. cu e ta wordo acusa di a haci actonan inmoral cu e hoben A. M. a desmenti esaki. Hues a bisa cu A. a bisa cu e tabata drumi riba un sofa y tapa cu laken. El a bisa cu M. lo a bay eynan y mishi cun’e y a masturba riba e laken. Segun M., nada ta berdad y cu A. a menace cu e lo bay percura pa M. perde su trabao. M. a bisa Hues cu e ta considera esaki un set up. Segun M., e dia ey e tabata drumi y ta ora cu Polis a bati na porta, el a lanta.

SOSPECHOSO TA NENGA

   Hues a bisa cu e hoben A. a yama Polis y amigonan. El a haya ataque di panico. Segun M., A. ta sufri di problema psycologico, “schzofrenie”. El a bisa cu den pasado A. a wordo viola. Door di e problema mental, A. lo ta kere cu M. lo bay abusa di dje. M. a bisa cu e dia ey e tabata na e cas hunto cu su yiu di 5 aña den camber y A. tabata drumi den sofa den sala. M. a bisa Hues cu normal cu ora e mama bay traha, A. ta sali y no ta keda den cas cu M. Sinembargo e dia ey A. a keda den e cas. M. ta conclui cu aki ta mira cu ta algo cu A. a planea. El a bisa cu e no sa si e ataque di panico tabata un set up of no. El a bisa cu A. sa haya e ataque di panico mas biaha. El a bisa cu e tabata drumi y ora el a tende hende bati na porta, el a bay habri e porta y tabata Polis.

1. a bisa Hues cu hopi biaha A. ta acus’e di a abusa di dje y e pareha di M., e mama di A. ta desconfia den M. M. a bisa cu hopi biaha A. ta set up problema entre M. y A. su mama. A. ta yama Polis y ora Polis yega, A ta bisa Polis cu M. kier a abusa di dje. Ora Polis interoga A., e ora ey e ta bisa cu M. no a haci nada.

NFI NO A HAYA PRUEBA

   Hues a bisa cu miembro di Instituto Forence, a manda muestra di e liquido cu a haya riba e laken pa Instituto Forence na Hulanda (NFI). Investigacion ta mustra cu no a haya sperma. Hues ta haya cu te asina leu, esaki ta confirma e declaracion di M. cu e no a masturba. Hues a mustra cu M. ta promer biaha cu e ta wordo persigui pa un caso asina pero tin un condena di maltrato di su pareha. Pa cu e situacion actual, M. a splica Hues cu el a muda cu e mama di A. na un otro cas y A. ta bibando den e cas cu su pareha actual.

VICTIMA A PAPIA

E victima A. a bisa Hues cu el a haya hopi miedo pasobra mira un sombra riba dje. El a sinti M. ta mishi cu su pianan y a masturba riba e laken cu A. tabata tapa su curpa cun’e. El a bisa cu el a haya panic attack na hospital y tabata hopi spanta. Su siguiente dia e por a bay cas y a haci denuncia contra M.

DEMANDA DI DAÑO

Hues a bisa cu e demanda inmaterial ta 5 mil florin y no tin calculacion di otro daño.

FISCAL A EXIGI CASTIGO COMBINA

Fiscal a bisa Hues cu Polis a bay na un cas na Piedra Plat pa un dama cu lo a wordo abusa. Polis a haya e dama hoben A. tabata hopi emocional. Segun e relato di Polis, A. a bisa cu M. lo a mishi cu su parti intimo y lo tabata masturba banda di dje. Fiscal a bisa cu e mama di A. a haci denuncia y loke e mama a declara na Polis ta consistente cu e declaracion di A. Esey ta motibo cu Fiscal ta haya cu e declaracion di A. ta confiabel. Fiscal a sigui bisa cu Polis a haci investigacion biologico riba e laken cu A. tabata tapa su curpa. NFI no a haya sperma riba e laken. Na opinion di Fiscal, tin dos posibilidad. Tin e posibilidad cu loke A. ta bisa no ta berdad, of e posibilidad cu no ta asina cu M. a masturba. Fiscal a bisa cu no ta pasobra cu no a haya sperma pa difinicion mester bisa cu e declaracion di A. no ta berdad. El a bisa cu mester busca otro prueba di sosten. Fiscal a mustra cu un tempo cortico despues di e sucedido, A. a sufri un ataque di panico y tabata grita histerico. Polis ta haya cu algo lo mester a pasa cu A. a actua asina. Polis ta conoci cu A. pa casonan anterior y ta promer biaha cu nan ta confronta un situacion asina. Fiscal a mustra tambe cu un amiga di A. a declara cu A. a yam’e pa hib’e hospital y el a constata cu A. tabata hopi emocional. Fiscal ta haya cu esakinan ta pruebanan di sosten. Fiscal ta haya M. culpabel di a mishi cu e hoben A. Fiscal ta considera esaki, actonan inmoral caminda a tacha e integridad di A. El a bisa cu esaki por causa cu A. lo por keda afecta pa hopi tempo. Pa cu e castigo, Fiscal a bisa cu e ta tene cuenta cu e tempo cu M. tabata sera relaciona cu e caso. E tabata 105 dia sera. Fiscal a exigi 180 dia di prison, di cual 75 dia ta condicional cu un tempo di prueba 2 aña.

   Fiscal ta haya e demanda di daño inmaterial ta 5 mil florin y no por aproba e demanda. Na opinion di Fiscal, ta asina cu A. tabata patient di Respaldo y esey ta haci fastioso pa dicidi riba e demanda awor.

Hues, despues di a scucha defensa di abogado, a bisa cu e ta bay studia e caso y dia 9 April 2026 pa lo tin sentencia.