Fiscal a exigi 6 aña di prison pa docente di gym cu a abusa di mucha homber di 9 aña

Mama na yoramento a bisa Hues cu su yiu a purba mata curpa 4 biaha

ORANJESTAD (AAN): E homber E. di 46 aña riba Diabierna mainta den Corte a scucha Fiscal exigi 6 aña di prison p’e y cu pa 11 aña e no por traha mas como docente di movecion pa salud (gym) na ningun school. Den e articulo aki, DIARIO ta publica tratamento di e caso y exigencia di Fiscal. Den un otro articulo lo publica e defensa di abogado.

   Fiscal ta haya E. culpabel di, mas cu un biaha entre 2014 y 2017, a forza un studiante na school pa e haci actonan inmoral cu e mucha homber M. Tambe Fiscal ta acusa E., di pornografia di mucha desde 2011. Fiscal a bisa cu E. a mishi na atras di e mucha M. di 9 aña y penetr’e cu dede diferente biaha. Tambe E. a dun’e sunchi.

   Durante tratamento di e caso a sali na cla cu M. ta bay cumpli e aña aki 18 aña y aña pasa, despues di a purba mata su curpa, el a bisa su mama cu E. a abusa di dje. Aña pasa miembronan di KZP a cuminsa investigacion cu a conduci na detencion di e docente.

   Nenga pornografia di mucha: Den sala di Corte tabata presente e mayornan di e victima M. y familiarnan. Tambe por a mira familiarnan di e acusado. Hues a hala tur hende nan atencion pa comporta nan mes den sala. Si ripara cu tin hende ta haci remarca, lo laga miembronan di CEA saca nan.

   Hues a puntra E., kico e ta pensa di e acusacionnan di Fiscal. E. a desmenti di pornografia di mucha y tambe di a mishi y abuso di M.

   Hues a mustra cu a haya E. cu diferente potret di muchanan. Segun E., el a saca potret di e muchanan homber sin t-shirt pasobra nan tabata train. El a bisa cu un potret, caminda tin un mucha cu carson baha y su atras afor, el a screen shot y a mand’e pa e mucha pa hala su atencion. El a bisa Hues cu e no a saca potret cu fin di abuso.

   Hues a bisa cu E. ta un docente di deporte (gym) na school. Hues a bisa cu el a papia cu un otro docente di deporte cu tambe ta duna les di deporte. E docente a bisa cu mester ta cauteloso con anda cu mucha. Hues a sigui puntra E. tocante e potretnan y si esakinan ta pa atrae sexual. E. a desmenti cu e potretnan ta atrae, sexual.

   Nenga di abusa mucha: Hues a bisa cu e mama di M. a haci denuncia y kico e ta pensa e denuncia di e mama. E. a desmenti di a abusa di e mucha.

Hues a bisa cu un persona cu tabata core pasantia na e school, a declara na KZP cu el a mira E. ta haci movecionnan sospechoso. El a mira E. a brasa un mucha di patras y a frega cu su parti intimo na e mucha. E. a desmenti esaki. El a bisa Hues, cu tin biaha e sa kraak muchanan su lomba pero ningun momento e ta frega riba e mucha.

   Fiscal a mustra cu E. tabatin chat basta pisa riba sex cu un mucha homber. Segun E., tur esey tabata wega cu nan tabata haci. Segun E., eseynan no tabatin ningun balor sexual. Fiscal a remarca cu tabatin palabranan basta pisa cu ta duna e impresion cu nan lo kier tabatin relacion cu otro. Fiscal a mustra tambe cu E. tabatin un potret di un mucha den baño cu su parti intimo afor. E. a bisa cu el a bay saca e potret y net e momento ey, e mucha a haci asina.

   Fiscal a mustra cu e mucha M. hasta a declara cu el a pensa di mata su mes. E. a bisa cu e ta haya hopi lamentable esey. El a sigui bisa cu e por a compronde cu tabatin problema familiar du famia di M. y cu e famia a dicidi di bay Hulanda. E. a bisa cu e no sa pakico M. a declara asina contra dje, siendo cu nada a pasa. El a bisa cu e ta un persona hopi familiar cu muchanan pero esey no ta conduci cu e ta bay abusa di mucha sexual.

   Mama di mucha a expresa na yoramento: Mama di M. a hiba palabra den Corte, haciendo uso di cambio di ley penal caminda mayor di victima por hiba palabra den Corte, promer cu Fiscal y abogado hiba palabra. Por a nota cu e mama M. tabata hopi emociona. El a bisa cu te ainda su yiu ta afecta. E ultimo 11 luna tabata di angustia. Nan yiu a worde afecta door di acto di E. E mucha tur dia mester lucha cu e angustia y problema psikico.

   Na yoramento el a bisa cu esaki a causa cu 4 biaha su yiu kier a mata su mes. E mama a bisa cu for di 2024 e mucha ta sufriendo y ta hayando tratamento psicologico. El a expresa cu ta hopi tristo pa mira con su yiu ta sufriendo. Por a nota cu mientras e mama tabata papia, su casa y otro miembronan di famia tambe tabata yora.

   E mama a bisa Hues cu famia ta envolvi den tur e sufrimento aki. E mama a pidi Hues pa tene cuenta cu tur e sufrimento aki y pa haci husticia pa su yiu y manda un señal bon cla den comunidad, cu no ta acepta esaki. E mama a expresa cu e ta spera cu otronan cu ta victima tuma lo haya e curashi pa haci denuncia.

   Demanda di daño: E mama a bisa Hues cu placa lo no drecha e situacion cu su yiu ta pasando aden. El a bisa cu e gastonan ta encera e pasashinan cu a cumpra pa bin for di Hulanda pa haci denuncia. E mama a splica cu, e aña aki su yiu ta haci 18 aña y e no ta cay mas bao di aseguro. Awor ta e mayornan mester bay paga. El a bisa cu psicologo kier interna M. den un clinica pa haya tratamento contra su ideanan pa mata curpa.

   Fiscal: Fiscal a bisa cu e ta cita un frase cu el a topa den e documentonan. “Tur e añanan aki mi a pensa cu mi por a handle pero no a logra, E unico cos cu mi a pensa ta suicidio pa kita tur esaki”. Esaki ta expresion di e victima. Tur esaki ta motibo di cu 8 aña pasa e hoben a bira victima di un docente di movecion pa salud.

   Na opinion di Fiscal, ora cu tin e situacion cu e sospechoso E. ta nenga, bo tin como prueba mas importante, declaracion di e victima y mester tin otro pruebanan di sosten. Fiscal ta haya cu tin suficiente prueba cu ta mustra cu E. a abusa di e mucha M. Fiscal ta haya e declaracion di M. ta confiabel. El a bisa cu e declaracion di M. ta consistente y hopi detaya. Di otro banda tin declaracion di E. cu ta desmenti categoricamente.

   Mucha kier mata curpa: Fiscal a mustra cu na Maart 2024, M. di 16 aña a purba mata su curpa. Door di actua liher y intervencion medico, no a yega asina leu. E mama a cuminsa papia cu M. y a bin sali na cla cu M. a worde abusa sexual. Despues di combersacionnan cu su mama, M. a bisa cu esaki a sosode na school door di E. den e camber di bisti paña. El a bisa cu e promer biaha, e mester a keda pa yuda limpia e gymzaal.

   Ora e tabata den camber di bisti paña, E. a drenta den e camber hinca man den carson di M. y mishi cu ne cu su dede y penetr'e. Tambe cu E. a mishi cu e parti intimo di M. Mientras cu Fiscal tabata papia, por a mira cu e tata tabata yora y sacudi cabez di duele y rabia. Por a mira cu otro miembronan di famia tambe tabata yora. Fiscal a mustra cu diferente biaha M. a purba mata su mes. Fiscal ta haya cu tur esaki ta motibo pa no duda den M. su declaracion.

   Fiscal a mustra cu 30 Mei 2024, bou guia di Hues Comisario a bay haci investigacion na dos cas y a haya diferente computer cu a bay investiga. A haya potret di muchanan bou di 18 aña y ta considera esaki pornografia di mucha. Tin potret di un mucha cu su carson baha. Fiscal a bisa cu segun ley, tur esaki ta castigabel. Tambe el a mustra cu tin combersacionnan “chat” entre E. cu un mucha homber riba di 16 aña caminda nan tabata papia amplio di tin relacion sexual.

   Fiscal a exigi 6 aña di prison: Pa cu e castigo, Fiscal a bisa cu e ta tene cuenta diferente biaha E. a abusa di un mucha homber cu e tempo ey tabatin 9 aña. A haci actonan inmoral y tabatin relacion cu e mucha. Fiscal ta haya cu E. a abusa di e confianza cu e mayornan y e mucha mester tin den un docente di deporte. Fiscal a mustra cu por a scucha di e mama, cu 4 biaha, M. a purba mata su mes. E hoben ta bou tratamento y tin problema psicologico.

   E mayornan ta biba den un angustia cu M. ta bolbe purba mata su mes. Fiscal a bisa cu ultimo añanan, hopi caso di abuso a bin Corte y e reaccion di comunidad a pone cu a cambia castigonan pa abusonan sexual. A subi e castigo. Fiscal a expresa cu ni cuanto castigo duna, no lo kita kico a pasa cu M. Fiscal a exigi 6 aña di prison. Ademas, el a exigi pa prohibi pa E. sigui eherce su trabao como docente di deporte pa un periodo di 11 aña. Fiscal a pidi Hues pa aproba e demanda di gastonan material di viahe y estadia y e gasto inmaterial di 25 mil Florin pa paga.

   Hues, despues di a scucha defensa di e abogado mr. Illes, a sera tratamento di e caso y dentro di algun siman lo por spera sentencia.