Fiscal a exigi 4 aña di prison pa homber cu a causa accidente fatal na Calbas

Chofer bao influencia di alcohol a dal frontal contra Harley Davidson

• Esey tabata su di 2ndo accident ocasiona na Calbas
• Homber ta djis neglisha reglanan di trafico di Aruba 

ORANJESTAD (AAN):  E homber Colombiano biba na Aruba Javier Tejedor Perez Tejedor (J.P.T.) (64) a presenta ayera den Corte di Husticia pa duna cuenta pa e delito serio cu el a haci na Mei 2024. Fiscal ta haya J.P.T. culpabel di a ocasiona un accidente fatal na Calbas, caminda J.P.T. bao influencia di alcohol a bay pasa un truck y dal frontal contra e victima, e conocido futbolista y atleta Jeferson Lopez di 28 aña cu tabata coriendo su Harley Davidson. Door di e impacto fuerte, Lopez a fayece na e sitio.

   Den sala di Corte tabata presente familiarnan di J.P.T. y familiarnan di e defunto Lopez.

   Dal frontal contra motorcycle: Hues a puntra J.P.T., kico a pasa riba e Diabierna 24 Mei 2024. J.P.T. a cuminsa cu pidi pordon na famia di e fayecido. El a bisa cu dia 24 Mei 2024, e tabata trahando na cas y mester a bay busca su señora. El a bisa cu el a bebe dos drinks promer y a bay cu drink alcoholico den auto. Segun J.P.T., e tabata core na Calbas y un truck tabata para riba caminda. El a mira e motorcycle ta bini leu for den direccion contrario. Segun J.P.T. ora e tabata pasando e truck el a topa cu e motorcycle y door cu e truck ta grandi, e no a logra pasa n tempo.

   Hues a bisa cu si J.P.T. a warda un poco y warda e motorcycle pasa, nada lo a pasa. Hues ta haya cu J.P.T. no a calcula bon. J.P.T. tabata blo bisa Hues cu si e truck no tabata para riba caminda, e accidente lo no a sosode.

   Core bao influencia di alcohol: Hues a puntra si J.P.T. tabata bao influencia. Segun J.P.T. el a bebe dos glas di biña y tabata conciente con e ta core. Hues a señala cu e test di alcohol a mustra cu J.P.T. tabatin 2 biaha mas tanto alcohol den su rosea di loke ta permiti pa ley. Hues a remarca tambe, cu mirando e cantidad di alcohol, no ta posibel cu J.P.T. a bebe 2 glas so di biña.

   Segun J.P.T. e dia anterior el a bebe anochi y a bay drumi. Hues a bisa cu aparentemente ainda J.P.T. tabatin alcohol den su sistema di e dia anterior. Hues a remarca cu J.P.T. ta actua manera ta algo normal a sosode siendo cu un persona a perde su bida.

   Tira culpa riba e truck: J.P.T. a pidi disculpa y a bisa cu por ta a interpret’e robez. El a bisa cu Lopez ta su bisiña. El a bisa cu si e truck no tabata eynan, nada no a pasa. Hues a remarca cu si J.P.T. no a bebe y no a pasa e truck, nada no a pasa.

   Riba pregunta di abogado mr. Falconi, J.P.T. a bisa cu e motorcycle tabata core duro y door di e impacto el a perde conocimento. Hues a remarca cu si e motorcycle tabata core duro ta mas motibo cu J.P.T. no mester a pasa e truck sino laga e motorcycle pasa promer.

   A kita rijbewijs y tog ta core auto: Hues a mustra cu J.P.T. no tabatin rijbewijs. A resulta cu relacion cu e accidente di 2022, na 2023 tabatin e caso penal caminda a kita e rijbewijs di J.P.T. pa un periodo di algun luna.

   Apesar cu a kita e rijbewijs, J.P.T. tabata core auto tog y a bolbe ocasiona un accidente hopi mas serio caminda Lopez a perde su bida. Hues a bisa cu ora e lesa e raport di Polis, ta parce cu J.P.T. no ta respeta reglanan di trafico.

   Otro accident den pasado: A bin sali na cla, cu e tabata envolvi den otro accident pisa caba.  Hues a mustra cu December 2022, riba e caminda di Calbas pa Kudawecha, J.P.T. a ocasiona un accidente y tabata bou influencia. Polis a constata cu e tabata bou influencia pero J.P.T. no kier a blaas den aparato Alco Sensor IV. E tempo ey, J.P.T. a bisa cu el a bebe 2 glas di biña. Hues a remarca cu ta parce cu esaki, pues 2 glas di biña”, ta un declaracion standard cu J.P.T. ta uza.

   Demanda di daño: mr. Emerencia a presenta documentonan pa e demanda di daño material y inmaterial. A menciona daño di e motorcycle Harley Davidson, gastonan di entiero, daño inmaterial di problema psikico y tristeza. Tambe e abogado a haci demanda pa cubri gastonan di cuido di cachonan Fila Brasilero.

   Fiscal ta cuestiona acusado: Fiscal a bisa Hues cu dia 24 Mei 2024, Lopez (28) a fayece door di e impacto di e accidente. Esaki a causa un impacto fuerte pa famia. E dia aki tambe ta fuerte pa e acusado J.P.T. Fiscal ta haya cu J.P.T. a causa e accidente. El a mustra cu J.P.T. a sali for di su cas na Calbas pa bay busca su señora, mientras cu Lopez tabata bayendo su cas na Calbas. A sosode un choque frontal y Lopez a wordo saca door di e impacto y a bay cay basta leu sin bida. Fiscal ta mustra cu no tabatin marca di brake di J.P.T. Esey ta mustra cu J.P.T. no a brake. Si por a mira marca di brake di e motorcycle. Polis a constata cu J.P.T. tabata bou influencia di alcohol.

   Ora di supla, 867 µg/l (microgram per liter) a keda constata den rosea.  Posteriormente como 5 ora despues di e accidente a haci test di rosea un biaha mas cu J.P.T., y el a registra mas cu 400 µg/l, cu ta 2 biaha mas cu e cantidad permiti segun ley na Aruba.

   Fiscal a bisa cu hasta Polis a constata cu J.P.T. no tabata den estado pa duna un declaracion. El a señala cu J.P.T. no tabatin rijbewijs pasobra Ministerio Publico a kit’e door di un accidente anterior na December 2022 cu J.P.T. a ocasiona.

   Fiscal a mustra cu J.P.T. promer a duna un declaracion no ta cuadra. Despues el a bisa cu tabatin un truck para mey mey di caminda. Investigacion ta mustra cu esey no ta cuadra cu e realidad. Na opinion di Fiscal, si tabata asina mes, J.P.T. mester a para y no pasa sin wak si tin trafico di contrario.

  A ocasiona dos accidente frontal: Fiscal ta haya cu J.P.T. no a duna preferencia y a dal frontal contra Lopez cu a causa su morto. Fiscal ta haya cu J.P.T. a core irresponsabel, a core bou influencia di alcohol y sin rijbewijs. Fiscal a mustra cu 14 December 2022 tabatin un accidente riba e caminda di Calbas – Kudawecha, caminda J.P.T. tabata bou influencia di alcohol. Aki tabata e promer biaha cu J.P.T. a dal frontal contra un auto.

   Dia 24 Mei 2024, J.P.T. ta causa di dos accidente frontal y ta culpabel di causa morto. Na opinion di Fiscal, J.P.T. no a haci e accidente intencional sino ta su culpa. Esey ta haci cu e castigo ta bira mas abao. Sinembargo no por kita afor cu a kita bida di un persona y a causa daño irreparable na un famia. Fiscal a mustra cu na Maart 2023, J.P.T. a wordo condena pa core bou influencia y su rijbewijs a wordo kita pa algun luna. Su siguiente aña, J.P.T. ta bolbe haci e mesun cos den su tempo di prueba. Fiscal a remarca cu ta parce cu J.P.T. no a siña di loke el a haci. El a mustra riba e caso na 2022 un choque frontal y 2 aña despues otro choque frontal ariba e mesun caminda, cu consecuencia fatal. Fiscal a tuma J.P.T. na malo cu e ta purba tira e culpa riba otro.

   Pa loke ta e demanda di daño di brommer, gasto di entiero, Fiscal ta aproba esakinan. Pero e resto, el a pidi pa Hues declara nan no admisibel. Fiscal a mustra cu a base di ley, no por aproba daño di tristeza y tambe e demanda di daño psychico e no ta haya suficiente motiva.

   Fiscal a exigi 4 aña di prison pa J.P.T., kita su rijbewijs pa 5 aña y pa ehecuta e 2 siman di prison condicional.

   Abogado: mr. Falconi a pidi disculpa na famia di parti di J.P.T. E abogado ta haya cu J.P.T. a bay pasa e truck y no tabata core iresponsabel. El a bisa Hues cu ora cu J.P.T. a pasa e truck, el a hay’e cu e motorcycle cu a core cu velocidad halto. E abogado a pidi Hues pa declara e demanda di daño no admisibel pasobra el a haya esaki ayera den oranan di anochi y no por a papia cu su cliente riba esakinan. Hues a bisa cu segun ley, den Corte por haci demanda di daño y no mester manda esaki for tempran. Hues a duna abogado tempo pa papia cu su cliente. Despues di un pausa, e abogado a bisa Hues cu J.P.T. ta dispuesto di paga gastonan di e motorcycle y entiero.

   Hues a sera tratamento di e caso y a bisa cu 7 Februari 2025 pa 8:15 am tin sentencia.