Fin di siman aki lo habri sistema pa aplica pa cita pa busca plach’i number

Percura pa bo tin recibo di bo pagonan online

• Opcion pa hende priva, negoshi, y pensionado
• Cada hende priva por bay busca 5 plachi maximo 

ORANJESTAD (AAN): Despues di dos siman cu personal di Departamento di Impuesto (DIMP) a controla y revisa tur plachi nobo pa Number di Auto, awor nan ta cla pa cuminza haci entrega.

   Durante un conferencia di prensa, directora Luenne Gomez-Pieters a confirma loke a ser publica algun siman pasa caba den prensa, esta cu e biaha aki lo bay funciona den sistema di traha cita pa busca plachi di number.

   Pues e biaha aki no ta bay duna servicio di prome cu yega, ta haya servicio prome, mirando cu den pasado a pasa den mal experiencia cu esaki, caminda ciudadanonan a haya nan ta bin para hopi trempan den rij di marduga pa por haya plach'i number.  Pesey e biaha aki kier structur’e den mihor manera.

   Tin total 92.000 plach'i number pa wordo entrega, di cual 79.916 plachi ta pa A-nummer.  Durante 2024, solamente 84% di automobilistanan a cumpli cu pago di Motorrijtuigbelasting.  Toch e ta mehorando, danki na e opcionnan di pago cu DIMP ta ofrece y asina evita cu nan tin di paga boet, si acaso nan haci pago despues di 31 Januari venidero.

   Plachi di 2025-2029: E plachi nobo color blauw, lo tin validez di cuatro aña, y lo tin e aña “2025-2029” imprimi tambe riba dje.

   Loke nan ta bay enfoca hopi riba dje e biaha aki ta e importancia cu e cliente mester tin un aseguro valido riba su auto, na momento di ricibi e plach'i number!  A crea un cooperacion estrecho cu companianan local di Aseguro, y tambe Asociacion Local, pa por bin cu cierto cambio no djis riba tereno di digitalizacion, pero di informacion cu DIMP por haya na momento cu cliente ta bay paga aseguro di auto of vehiculo, por mira den futuro cercano si e ta asegura of no, y tambe lo por haci cambionan di ley cu por mara e aseguro di auto y vehiculonan na Aruba na e mesun periodo di validez di e number.  Pues den futuro si acaso bo paga prome mitar di aña di number... bo aseguro tambe mester ta valido pa e prome mitar di aña.  Esey ta combersacionnan cu ainda ta andando.

   Pa traha cita: Directora Luenne Gomez-Pieters a splica cu pa fin di siman aki e opcion pa haci cita pa busca plachi di number lo ta riba nan website.  E biaha aki lo haci tres diferencia di ‘persona’ cu por haci cita pa busca plachi.  (1) Persona priva. (2) Negoshi. (3) Pensionado.   Segun e directora, e ultimo aki a bin acerca pa asina crea un seccion special pa atende pensionadonan.

   Pa priva: Si bo ta un persona priva, bo por haci un cita pa busca maximo 5 plachi.  Pues un persona por busca plachi di su mes, di su casa, di su ruman, di su mama, etc.  DIMP lo prefera tur hende bay busca 5 plachi, pasobra mas rapido lo keda cla asina.  Personanan priva lo bay haya cita for di Dialuna te cu Diabierna.  E sistema di cita lo ta casi similar cu esun cu Censo ta uza, pues ta duna tur hende “time-slots’ di 10 minuut.

   Pa compania: Si bo ta un compania, e cantidad di plachi cu por busca pa cada cita na 25 plachi.  Si e compania tin mas cu 25 plachi pa busca, lo tin di haci mas cita.  Si ta un compania priva cu ta busca plachinan pa nan empleadonan, tambe ta wordo acepta door di DIMP.  Companianan lo haya chens di busca plachi riba Diasabra.  E ‘time-slots’ ta un tiki mas largo compara cu esnan di personanan priva.

   Pa pensionado: Pa e pensionadonan tambe ta usa time-slots similar cu esnan priva, pero DIMP ta haci adaptacion y nan NO mester traha cita online via computer.  Pensionadonan so mag di yama 522-7423 of 522-7424 y e funcionarionan lo pone un cita den nan calender computariza pa nan haya un dia y ora.  Si acaso bo no kier yama telefon, bo por bay na DIMP mes na e Balie di Recepcion, y eynan tambe lo traha un cita pa bo pa futuro fecha y ora pa busca plachi di number.  Ta tratando di schedule tur pensionado pa un cita for di 8:00 am te cu 9:00 am, di Dialuna pa Diabierna.

   Tuma nota cu pensionado por bay busca solamente 2 plachi maximo pa cada cita.

   Corda cu www.impuesto.aw ta e website di Departamento di Impuesto.