Fiesta Rotaria lo tin mas di 8 container di producto y mas premio tambe

Fin di Maart tin Fiesta Rotaria 2026: ‘Bini Uno, Bini Tur’

ORANJESTAD (AAN): Rotary Club of Aruba ta orguyoso di anuncia oficialmente e fecha pa un di e eventonan mas grandi y mas spera di nos isla: Fiesta Rotaria 2026 lo tuma luga riba diadomingo 29 di maart 2026, for di 9:00 am te 5:00 pm, na Parking Lot Stadion Guillermo Prospero Trinidad na Dakota. Cu e lema “Bini Uno, Bini Tur”, e edicion 2026 ta invita henter comunidad pa reuni, celebra y alavez contribui na un causa noble.

  Manera ta conoci, Fiesta Rotaria ta mucho mas cu un feria; e ta un evento familiar grandi cu ta combina supermercado, paña, cuminda, coi bebe, producto pa cas, mata, wega pa grandi y chikito, musica, baile y entretenimiento y mas. Ta un dia caminda amistad, ambiente y solidaridad ta encontra den un solo lugar.

Un di e punto culminante di e evento ta e gran rifa anual. Pa solamente 25 Florin pa ticket, participante tin oportunidad di gana un di 16 premio spectacular. E prome premio ta un Kia Carens 2026 completamente nobo, incluyendo un aña di seguro gratis.

   Entre e otro premio tin 2 pasashi Economy Class Aruba–Amsterdam–Aruba, un iPhone 17 di 256GB, varios gift certificates di Afl. 1,500, Afl. 1,000 y Afl. 500, weekend stay pa dos persona na hotel, un aña di servicio di celular, un airco di 12,000 BTU, pasashi Aruba–Curaçao, joya y un premio cash di Afl. 500. E sorteo oficial lo tuma luga e mesun diadomingo 29 di maart 2026 pa 5:00pm na presencia di notario.

Importante ta pa destaca cu, manera semper, tur fondo recauda durante Fiesta Rotaria ta bay bek directo den nos comunidad. Rotary Club of Aruba ta uza e entrada aki pa financia y sostene diferente proyecto social cu ta beneficia mucha, adulto mayor y otro grupo cu tin necesidad di apoyo. Asina, cada ticket cumpra y cada articulo bendi ta bira un inversion directo den bienestar di Aruba.

   Como parti di e anuncio oficial, Rotary Club of Aruba a ofrece diabierna mainta un conferencia di prensa pa comparti mas detaye tocante patrocinadonan, premio y logistica di e evento. Aki a hiba palabra Rubiela Lampe, president actual di Rotary Club of Aruba, Shelby Maduro como relacionista publico di Fiesta Rotaria y Bert Kamsteeg di e comision organizado.

   Rotary Club of Aruba ta extende un danki sincero na tur patrocinado, boluntario y miembro cu ta traha incansablemente pa haci Fiesta Rotaria 2026 un gran exito. Sin e compromiso di comercio local y e apoyo continuo di comunidad, e impacto social di e evento no lo tabata posibel.

   Marca e fecha awor: 29 di maart 2026. Bini Uno, Bini Tur y haci parti di un tradicion cu no solamente ta celebra comunidad, sino tambe ta fortalece y yuda construi un futuro miho pa Aruba.