Fecha 1 di mei pa entrega iniciativa di ley manera Secretario di Estado y Gabinete saliente a acorda ainda ta vigente

Presidente di Staten Marlon Sneek:

ORANJESTAD (AAN) Presidente di Parlamento, señor Marlon Sneek, den entrevista cu DIARIO a menciona cu Parlamento riba su mes, a haya bishita di Secretario di Estado Zsolt Szabó, y locual el a acorda cu e gobierno saliente ta cu dia 1 di Mei proximo, nan lo entrega e iniciativa di ley, tocante tarifa di interes riba prestamo di Hulanda.

E Presidente di Parlamento a bisa cu no mester lubida cu e ley aki ainda mester cana su caminda, esta, bay Raad van Staten, prome cu yega Tweede Kamer, pa debati riba dje.

El a agrega cu pa e detayenan si mester pone claramente cu tin temanan cu ta toca Curacao y Hulanda, p’asina tin e rijkswet entrega, basa riba e acuerdo, pasobra e tin cu bira un ley cu tin e puntonan cu tur hende ta di acuerdo cu ne, y no cu wak algo cu toch ta wak e diferente.

Sneek a bisa cu un siman prome cu Secretario di Estado a bin, Parlamento a manda un carta pa Gabinete bin duna su punto di bista, riba e puntonan cu a tende un biaha mas for di Secretario di Estado unda cu e discusion di mas grandi ta e hecho cu ta bay pone normanan pa Pais Aruba den un Rijkswet y nan a scuche bon cla cu via di Landsverordening, e no ta confi’e mas.

Esaki pasobra el a sosode den pasado na 2014 via Landsverordening, na 2018 tabata tin cambio di Gobierno, y e gobierno a cambia e acuerdonan cu tabata tin, pues nan kier awo un Rijkswet unda cu den nan man ta pa haci e cambionan y nan no ta depende di un partner, den e caso aki cu e so ta bay tuma e decision di haci cambionan den e ley.

“Eynan nos ta, e fecha di 1 di Mei ta vigente ainda, y manera mi a bisa na principio, ta bon pa nos no lubida cu 1 di Mei no kiermen cu mundo a caba, pero e kiermen cu e ley mester ta na Raad van Staten pa cuminza cana su proceso di ley, manera tur ley na Aruba cu mester bay na Raad van Advies, na Hulanda ta Raad van Staten pa duna su advies riba dje, gobierno ta hay’e bek y ta haci e cambionan basa riba e advies cu el a haya, y ora ey ta bay Tweede Kamer, y e proceso di debate riba e ley aki mester cuminza”, Presidente di Parlamento Marlon Sneek a splica. El a acentua cu como cu e ta un Rijkswet di consenso, Parlamento mester tin consenso prome cu entreg’e.