Fayecimento inespera di conocido fotografo Gina Burleson-Werleman

Diaranson atardi

ORANJESTAD (AAN): Riba Diaranson den oranan di atardi, alarma a ser bati ora cu e conocido fotografo Gina Burleson-Werleman a bira malo na su cas.

   Tur cos ta mustra cu ta un paro cardiaco el a ricibi, y di e momento ey Gina a fayece al instante.  Un tristeza enorme a reina mesora cerca su ex-coleganan, famia, y amigonan.

   Su nomber mes ta Darlise Jeanine Werleman y a nace na Aruba dia 11 di November 1966, pues tin 59 aña di edad.  Pero tur hende conoce como Gina, y tabata hopi activo na edad hoben den deporte.  Gina tabata competi den team di Volleyball, y su futuro casa Robby Burleson (dfm) tabata referee.  Asina nan amistad a start, y nan a casa cu otro.

   Ademas di su trabao pa negoshi di su tata, Gina tabata activo sacando potret.  E tabata yuda su casa Robby tin biaha, y despues e mes a cuminza saca potretnan.  Su forma cordial di papia cu hende ta admirabel, aunke tin biaha ora e por tin mal beis, miho a keda un tiki leu di dje.  Pero su mal beis ta kita mesora.

   Ademas di su hobby di viahamento, Gina su pasion tabata saca potret di actividadnan social, di fiesta, evento cultural, y tambe saca potret di Bruid.  Tur Diabierna e tabata acudi na Stadhuis pa check cual parehanan ta desea pa e saca potret pa sali den DIARIO.

   Gina tabatin problema ultimo tempo cu su wowonan, y tambe tiki problema cu sucu.  Pero no tabatin berdaderamente algo serio cu e tabata sufri di dje.

   Gina tabata dado momento hasta e “cara di DIARIO” ora di subi caya pa asina busca informe y potret di eventonan.  Lo bay sinti su falta grandemente.

   Na Gina su famia, su yiu homber Miguelito, y demas famia na e.o. Aruba, Mexico, y Bonaire, famia Mansur y DIARIO ta extende su mas profundo palabra di condolencia.