The content originally appeared on:
Diario
Miosotis Tromp di FADA ta splica:
ORANJESTAD (AAN) Miosotis Tromp, Trahado Preventivo di FADA, den entrevista cu DIARIO a duna di conoce cu e fundacion tin plannan prepara pa e temporada cu ta casi den porta, esta Pasco di Nacemento y Aña Nobo, cu semper ta hopi druk.
Miosotis a bisa cu e temporada aki ta un “hot season” pa loke ta consumo di alcohol y pa esaki nan tin algun plan di concientizacion prepara.
El a menciona cu pa casualidad FADA a haya un par di cifra di accidentenan cu ta duna nan un indicacion con e ta bayendo. “Nos ta un tiki preocupa, y den e caso aki nos ta pusha pa trece mas concientizacion riba esey, y trece cifranan pa comunidad ta na haltura kico ta ‘going on’. Hopi biaha nos ta pensa cu ‘no ta pasa cu nos’ pero den un habri y cera di wowo, e por pasa cu cualkier persona”, Miosotis a indica.
El a agrega cu, lamentablemente, riba e cifranan a bin resulta cu tin personanan bao 18 aña, cu no tin rijbewijs cu ta cay den e cifranan halto.
E campaña cu nan tin aworaki ta esun normal di tur aña y tin prepara campaña pa e adultonan cu tin rijbewijs y esnan bao di dje. FADA ta pasa tambe na tur scol, keda informa e muchanan riba esaki.
E consumo di alcohol no ta solamente bao chofernan di auto pero tambe di brommer. Mester tene cuenta cu e peaton mucha y adulto cu ta wordo poni na riesgo. Den e caso aki FADA ta bezig cu Asociacion di Aseguro na Aruba (IAA) y tambe cu Polis (KPA) cu ta keda den contacto cu ne pa loke ta e data, cifranan, y tambe cu diferente compania cu por aporta na prevencion.
