FADA lo pone Proyecto BAR mas visibel den 2026

ORANJESTAD (AAN): Fundacion Anti Droga Aruba (Fada), pa aña 2026 tin plannan mas grandi di conscientisacion tocante e proyecto BAR,

‘Bo Amigo Responsabel’, cu ta pone BAR  mas visibel den comunidad. Señora Rubiella Toppenberg di FADA, den un entrevista recien cu DIARIO a declara cu no solamente kier duna informacion tocante BAR, pero kier hacie mas visibel pa na momento cu hende ta stuur, nan por wak e presencia di BAR tur caminda.

   Segun señora Toppenberg, ora cu wak algo, e ta crea mas impacto. Ideanan cu Fada kier logra den e proximo aña ta entre otro borchi y billboards grandi dilanti tur bar, restaurant, supermercado y tur caminda cu ta bende alcohol. E plan aki ta rekiri un presupuesto grandi y den 2026 Fada lo busca e fondo aki pa logra esaki y haci BAR mas grandi y mas visibel den comunidad.

   Mientras tanto, e yamada na pueblo di Aruba pa e temporada di fiesta ta keda simpel: “Si bo kier bay dal dos, sea consciente y busca ‘Bo Amigo Responsabel’ prome cu bo sali di cas. Te hasta, por plania un dia prome.”