ORANJESTAD (AAN): Dia 17 di maart, Movimiento Electoral di Pueblo (MEP) a inaugura su exposicion “Status Aparte” pa conmemora 40 aña di Status Aparte y 50 aniversario di Himno y Bandera.
E exposicion aki a wordo organisa bou di e responsabilidad di Parlamentario Xiomara Maduro, kende a presenta e historia di e lucha pa Status Aparte. E enfoke principal tabata riba e declaracion historico cu Betico Croes a haci na su yegada na Aruba dia 18 di maart 1983: “nos a duna 18 di maart un dimension nobo.”
E apertura oficial a wordo realiza pa lider di MEP Evelyn Wever-Croes, hunto cu un nieto di Betico Croes, Gilberto Croes, den presencia di su famia y un grupo grandi cu a bin haya un prome bista di e exposicion.
Durante e evento, Parlamentario Maduro a duna un discurso unda el a splica e contenido di e exposicion y a gradici tur esnan cu a contribui pa haci e proyecto aki posibel.
E publico presente a mustra gran aprecio pa e exposicion, cual a wordo presenta di un manera bunita y profesional. E panelnan ta bon organisa cu informacion y portretnan historico. Ademas, tin dos telefoon unda bishitantenan por scucha discurso di Betico Croes y e himno di MEP, ambos di gran balor cultural pa Aruba.
Tambe tin material audiovisual unda por mira e trayecto di Betico Croes durante di e añanan, y e historia di fundacion di MEP na 1971, cu ta un momento clave den historia politico di Aruba.
Related News
“Parlamento a silencia gremionan y ta pone autonomia di Aruba na riesgo”
Minister plenipotenciario ta e bos oficial di Aruba na Den Haag
Gobierno a debilita nos democracia y ta ignora Pueblo den e proceso di Rijkswet HOFA
