Exitoso apertura di ‘College Fair 2024’ cu cantidad inmenso di bishitante

Tur 'booth' di informacion totalmente yen:

ORANJESTAD (AAN) – E prome dia di 'College Fair 2024', a tuma lugar Diabierna 8 di November na Renaissance Convention Center, unda varios instituto di enseñanza academico, local y internacional, a atende e cita di apertura, cu un cantidad grandisimo di studiantenan y hopi mayor, cu a bishita e evento pa ricibi informacion tocante e oportunidadnan di estudio localmente y den exterior.

            Combersando cu Muzanin Wever, Coordinador di College Fair, el a mustra hopi entusiasmo di a mira cu cuanto interes y acogida grandi e evento a cuminza y a keda cu un sala yen for di 11’or di mainta te atardi ainda.

            “Nos ta hopi contento!" Muzanin a expresa. Scolnan di casi tur parti di Hulanda, Canada, Caribe, Costa Rica, Aruba, tabata presente y nan tur a haya atencion di e studiantenan. Universidad di Aruba tabata tin e stand di mas grandi, y cantidad di hoben buscando informacion. Tambe e scol di Medicina di Costa Rica, UCIMED, a pasa ocupa henter mainta dunando informacion.

            E aña aki Belgica y Inglatera no tabata presente. Di Caribe por a mira institutonan di Curacao y Bonaire, cu tambe a ricibi un bon acogida.

            Den su siguiente edicion, DIARIO lo trece dilanti algun entrevista, entre otro, cu representante di Universidad di Aruba, Instituto Pedagogico di Aruba y WEB Aruba NV, cu ta ofrece oportunidadnan sublime pa nos hobennan cu ta studia riba tereno di tecnologia.