Ex-Prome Ministro Don Martina di Curaçao a fayece

ORANJESTAD (AAN): Riba Diasabra a drenta e informacion procedente di Curaçao, cu e ex-Prome Ministro, politico, y sirbido di pueblo,

Dominico Felipe ‘Don’ Martina a fayece cu 89 aña di edad.  El a ocupa e puesto di Prome Ministro na dos diferente ocasion di Antiyas Hulandes, y tabata conoci como un politico cu hopi influencia.  El a nace na Curaçao dia 1 Mei 1935.  El a studia como ingeniero civil na scol na Hulanda, tambe universidadnan na Antigua, y tambe Columbia University na New York.

   Su carera politico realmente a cuminza despues di e welga grandi na Curaçao na aña 1969.  Un welga di un sub-contratista na refineria di Shell na e isla, a desemboca y escala den un protesta nacional di poblacion, cu a finaliza den destruccion grandi den centro di ciudad di Willemstad.  Den e violencia ey cu e protesta y candelanan na negoshinan, en total 2 persona a perde nan bida cu centenares di herido.

   E protestanan aki a wordo mira como un expresion di pueblo cu nan ta infeliz cu nan status social y cu tur hende ta wordo laga atras.  Pesey na 1971 cu un grupo di persona, el a funda Movementu Antia Nobo, esta Partido MAN.  Nan a lanta cu e meta pa combati corupcion y nepotismo den gobernacion.  E mesun aña ey el a wordo eligi pa bay den Eilandsraad.

   Don Martina a bisa di comienzo cu e kier a pone un fin na e pasado colonial y cu e sistema di patronahe cu a keda keto bay bibo.  Den eleccion na 1979, Partido MAN a bira esun mas grandi na Curaçao y el a haya puesto di Prome Ministro.

   E ta e persona cu a atende asuntonan pa Antiyas, ora cu Aruba a mustra su deseo pa sali for di Antiyas Hulandes.  Don Martina pues a haye ta atende hopi cu Betico Croes di Aruba.  Pero di comienso a nota cu Don Martina a respeta e deseo di Aruba, aunke el a pronostica cu e salida di e isla lo bay trece consecuencianan negativo pa Curaçao y e resto di Antiyas di 5.  Pasobra Aruba ta esun cu mas tabata inyecta placa den tesoreria di Antiyas Hulandes.

   Despues di hopi negociacion, y hasta Conferencia di Mesa Rondo, finalmente na 1986 Aruba a haya status Aparte.  Esey a nifica cu Don Martina den su di dos periodo di gobernacion, mester a bay reduci gasto enormemente, y esey a bira un epoca dificil p’e.

   Su gobernacion a finaliza na 1988 ora cu su gabinete a cay.  Despues el a funciona como Parlamentario, prome cu na 1999 el a despedi di su carera politico.