Evelyn Wever-Croes e Gobernante di Siglo 21 te awe!

El a entrega prueba di  integridad cu el a scoge como base di Gobierno

*Pa kibra su logro mester supera su produccion den explosion di reto

*Recuperacion economico y financiero ta uni na e recuperacion moral 

ORANJESTAD (AAN) — Pa e eleccion cu mester tuma lugar dia 6 di December 2024, e parti di e proceso mas importante ta acerca, cu ta cumplimento cu e rekisitonan legal.

Sin duda e tareanan cu ta spera e candidatonan pa gobernacion di Aruba, ta mucho mas facil cu e tarea cu na 2017 a wordo entrega na e prome Gobierno di Evelyn Wever-Croes, cu no a gana eleccion pasobra AVP a haya alrededor di 300 voto mas cu MEP.

Pa AVP e realidad aki a nifica cu Pueblo cu na 2013 a duna Mike Eman un victoria abrumador, na 2017 a dicidi cu e caida di voto di AVP, cu Pueblo ta manda Mike Eman cas.

Evelyn Wever-Croes a acepta e reto, cu a haci cu na careda mester a atende cu un pakete di debe di Aruba, cu tabata e regalo cu Mike Eman a laga atras ora el a desaparece.

Na 2018 ya Evelyn Wever-Croes a splica Aruba con malo situacion tabata y cu Pueblo mester a bandona e soño di fantasia pa atende e destruccion financiero di Gabinete Mike Eman.

 Gobernante di Pueblo, naci den Pueblo, Evelyn Wever-Croes a duna inicio na su gobernacion di Aruba cu tabata topa cu Pueblo manera semper tabata su costumber prome cu el a haya titulo di gobernante.

Ama di cas den su bida personal, Evelyn Wever-Croes a entrega na Aruba su conocemento profesional, cu tabata base di su trabou durante 13 aña na Servicio di Impuesto, cu durante 9 aña el a dirigi.

Prome cu el a subi lista di MEP, el a traha como Abogado y aki ta e punto cu el a marca historia na un forma special.

Sin duda el a haci uzo di su capacidad profesional ora el a  drenta mundo politico di Aruba y wordo eligi cu voto preferencial na 2009 como miembro di Parlamento di Aruba.

Ta den e temporada aki e mester a mira con Gobierno Mike Eman, tabata destrui e base financiero di Aruba y asina deshaci di e logro di Status Aparte di Aruba.

Un Aruba den agonia, cu no por a mira futuro mas, a wordo entrega na cuido di Evelyn Wever-Croes na 2017 y el a bira e prome dama cu a asumi e posicion di Prome Ministro di Aruba.

Un titulo cu mester a ricibi un contenido completamente nobo ora el a tuma mando. E mester a bira e sirbidor real di Aruba y pone tur su conocemento, tur su esfuerzo, na bienestar di Aruba.

Den esaki su esposo, Kenneth Wever, su tres yiunan Christina, Kevein y Claudine, su nieto Trystan, mester a acepta cu nan ta comparti mr. Evelyn Wever-Croes cu Pueblo di Aruba.

Na 2019 e momento a yega cu Aruba por a presenta na Reino e milagro di un maneho financiero cu lo a pone cu Aruba su entradanan lo por a cubri su gastonan.

E presupuesto historico di 2020 di Aruba a wordo asalta pa e pandemia Covid-19, cu Prome Ministro Evelyn Wever-Croes a enfrenta na un forma dirigi y incansabel.

Prome cu mundo a bandona e temporada di Covid-19 ya e plan pa recuperacion di Aruba tabata traha.

Awe na 2024, ora mundo ta recorda cu cinco aña pasa na 2019, Covid a presenta na mundo, Aruba na man di Prome Ministro Evelyn Wever-Croes ta destaca den Reino y na mundo.

Prome Ministro Evelyn Wever-Croes no solamente a entrega Reino y mundo e prueba cu Aruba financieramente y economicamente por para riba su propio pia.

Durante e prome 24 añanan di Siglo 21, Aruba a wordo azota pa abuso di placa di e Pueblo cu a causa e debe nacional.

Pio ainda Aruba a wordo confronta cu e realidad di scandalnan den gobernacion di e pais, cu a haci cu Evelyn Wever-Croes a lanza su mes como defensor di Integridad, como bandero di moral di e pais.

Den porta di eleccion, e mester a entrega e prueba maximo di defensa di integridad, cu a haci cu den su carera como Prome Ministro, semper el a para na banda di Ley y Regla , cu ta base di democracia.’

E pakete moral cu mr. Evelyn Wever-Croes a entrega Aruba, asina ta refleha e dignidad di e Arubiano y e moral halto den bandera di Aruba.

Proximamente Aruba ta bay urna electoral.

Pueblo di Aruba lo dicidi con e ta bay celebra 25 aña Status Aparte na 2026 despues cu Evelyn Wever-Croes a entrega e pakete di exigencia di Status Aparte, cu ta entrega tur miembro di comunidad, e loke nan mester pa un base humano.

Pueblo den eleccion lo mester dicidi si e kier continuacion di Prome Ministro Evelyn Wever-Croes, cu durante e prome 24 añanan di Siglo 21, a entrega na Aruba, Reino y mundo, cumplimento di e concepto real di democracia, cu ta cuminsa cu bon gobernacion, di cual e ta ehempel como e gobernante cu mas a destaca durante prome 24 añanan di Siglo 21.