Evelyn Wever-Croes a entrega e prueba di liderazgo!

Analisis electoral di un isla sin rikeza natural cu a bira ehempel mundial

• Conseho di voto basa riba mezla di forza di autoridad y sentido humano
• Stabilidad economico a bira trankilidad y atraccion di mas inversion 

ORANJESTAD (AAN) Den e proceso democratico hancra den eleccion di gobernantenan, periodismo tin un tarea excepcional semper  y cuando periodismo por entrega prueba pa loke e ta trece dilanti.

   Periodismo tin e tarea pa verifica pa comunidad si e diferente instrumentonan democratico ta funciona na interes di henter Pueblo.

   E base di bon gobernacion cu mester wordo huzga, na prome lugar ta tene cuenta cu e forma cu gobernantenan a presenta nan mes y e contenido cu nan a duna na e base mas importante di democracia, cu ta honestidad mara na identificacion di e gobernante cu e Pueblo cu e ta representa.

E produccion material y no material di Evelyn Wever-Croes como lider di Aruba, a honra e concepto cu e tabata un bon gobernante di Pueblo?

Pa dicidi riba e punto aki, mester observa e base personal di mr. Evelyn Wever-Croes, un experto legal cu bon preparacion pa por a atende problemanan cu ta bati na porta di su pais y cu tabata tin necesidad di accion a base di Leynan cu ta dicidi pa gobernacion na Aruba.

Aruba a conoce un Prome Ministro cu a duna expresion maximo na Arubianismo y a cuadra completamente den e concepto di exigencianan basico di un Pueblo Arubano.

Prome Ministro Evelyn Wever-Croes a duna prueba cu e ta conoci cu e alma di Aruba na momentonan, cu e mester a tuma medidanan popular pero tambe tuma medidanan drastico cu Aruba no a conoce for di tempo di Segunda Guera mundial.

Ley ta exigi pa un gobernante cuida Pueblo mescos cu un bon tata pues tambe mama lo cuida un familia.

Esaki tabata e tarea special di Evelyn Wever-Croes cu na prome lugar mester a mira con e ta scapa e situacion financiero, economico y social di Aruba, cu tabata decisivo pa e pan cu e Arubiano ta pone riba mesa.

Na 2018, prome paso di mr. Evelyn Wever-Croes como Ministro Presidente no tabata pa yena Aruba cu cantidad di promesa falso, pero hustamente pa tuma e prome medidanan pa evita cu Aruba lo a zink hunto cu Florin!

E paso mas decisivo di Prome Ministro Evelyn Wever-Croes tabata pa exigi Citgo saca Aruba for di e soño maldito di refineria di Nicolas Maduro y debolbe e yabi di refineria pa asina Aruba por a habri posibilidadnan nobo pa su futuro.

Na 2018 cu firmeza Prome Ministro Evelyn Wever-Croes a inspira e Arubiano pa uni na e lucha pa scapa Aruba for di e pio desaster financiero cu e pais a conoce a base di e abuso cu a wordo comete dor di dos gabinete Mike Eman contra confiansa democratico di Aruba.

Manera por a spera di un bon cabezante di famia, conocedor di y luchador pa e alma di Aruba, Evelyn Wever-Croes manera cifranan y hechonan ta demostra, a comberti un isla cu un poblacion di alrededor di 100 habitante y sin otro rikeza natural, cu no ta e Arubiano mes, den un exito mundial di recuperacion y ehempel pa e paisnan mas grandi.

Inversionistanan a bolbe Aruba, cu a diversifica su economia pa asina nunca mas Aruba tabata depende solamente di turismo vulnerabel na hopi factor. Na mes momento mr. Evelyn Wever-Croes a deshaci di e paralisis mental cu economia di Aruba solamente ta depende di un refineria y a amplia e base economico di Aruba cu diversificacion.

Prome Ministro Evelyn Wever-Croes a percura pa un stabilidad economico, pero tambe pa un comunidad den cual Arubianonan, aunke migracion tabata necesario, por a reconoce nan propio identidad, mentalidad, cultura.

Mas y mas por a nota con durante ultimo temponan, Arubianonan ta resalta den logronan empresarial y personal den un ambiente di speransa, cu ta e factor importante di democracia.

Den Prome Ministro Evelyn Wever-Croes, Aruba a conoce un dirigente, e prome mama di e famia Arubano, cu a duna prueba cu democracia ta basa riba respet, forza di autoridad pero uni na e sentido humano.

Como prome dama den historia, mr. Evelyn Wever-Croes a funciona cu e autoridad cu su responsabilidad di Prome Ministro a exigi pero sin arogancia, cu ta enemigo di democracia.

Prome Ministro Evelyn Wever-Croes ta gobernante di henter Aruba, participante na e bida di e pais pero sin entrega di respet y dignidad cu su funcion a entregue.

Aruba a wordo transforma den un solo familia atrobe. Trankilidad y e esfuerzo Arubano pa yega na logro, a manifesta durante e epoca di su gobernacion, cu a habri porta pa mas inversion y aplauso mundial.

Tur factor cu ta necesario pa huzga un gobernante y forma cu el a comberti Aruba den ehempel mundial di logro nacional, manera verifica den cifranan y raportnan oficial di Aruba pero tambe den combersacion cu Arubianonan di tur partido, ta exigi pa awe e conseho di voto bay pa mr. Evelyn Wever-Croes pa hunto sigui hiba e lucha pa splica mundo y historia kico ta contenido di e grito: Ariba Aruba!