Estudio tecnico di UNOPS ta habri e caminda strategico pa un facilidad coreccional mas eficiente y resiliente

ORANJESTAD (AAN): Un estudio tecnico haci pa United Nations Office for Project Services (UNOPS) a duna Gobierno di Aruba

un marco strategico pa mehora e infrastructura coreccional di Aruba y eficiencia operacional.

E conclusion di e estudio ta recomenda desaroyo di un facilidad coreccional moderno, diseña pa mehora standard di detencion, fortalece servicio di rehabilitacion y introduci un modelo operacional mas eficiente pa e sistema coreccional di Aruba.

“UNOPS su asistencia tecnico ta duna Gobierno di Aruba un base solido pa move pa un sistema coreccional mas moderno y eficiente, alinia cu standardnan internacional,” segun Giuseppe Mancinelli, Coordinador di UNOPS Caribe. “Pa Small Island Developing States den Caribe, fortalece nan estado di derecho ta esencial pa construi institucionnan resiliente y sigur. Cu e trabao aki y nos experencia amplio den region, incluyendo proyectonan na Sint Maarten, UNOPS ta sigui sostene paisnan di Caribe den desaroyo di sistemanan di husticia mas efectivo y sostenibel.”

Segun e estudio, e facilidad proponi lo incorpora principionan sostenibel y resiliente pa sigura eficiencia operacional na largo plazo. E facilidad lo ta traha cu un duracion di bida di 40 aña y ta inclui flexibilidad pa por haci adaptacion segun cambionan demografico y necesidadnan cu ta cambia den e sistema coreccional di Aruba.

E proyecto lo permiti un miho clasificacion di persona deteni y espacio funcional adicional den e facilidad, incluyendo servicio medico mehora, area di rehabilitacion y otro infrastructura di apoyo necesario pa maneho di servicio coreccional di nivel halto.

Un analisis financiero preliminar ta proyecta un inversion di aproximadamente USD 119 million durante un periodo di cuatro aña, cu un posibel inicio di implementacion na 2026 y entrega di e proyecto pa 2028.

Ademas di mehora e calidad di servicio di detencion, e proyecto lo trece beneficio significativo pa personal di KIA y otro profesionalnan den sector di husticia, fortaleciendo siguridad na e sitio di trabao, simplificando procesonan operacional y mehorando eficiencia di personal. E plan tambe ta inclui entrenamento specialisa y iniciativanan di desaroyo di capacidad pa sigura cu personal di KIA ta debidamente prepara pa opera y maneha e facilidad coreccional nobo segun standardnan halto.

Finalmente, e iniciativa lo fortalece coordinacion entre e diferente actoran den cadena di husticia di Aruba, incluyendo instancianan di siguridad y corte, contribuyendo na un sistema di husticia mas integra y efectivo.

Top of Form