Esnan cu ta bay vakantie y tin boet habri na OM corda cumpli cu pago prome cu yega Aeropuerto

Fiscal Zamira Paesch:

• Evita cu Grens Politie para bo y talbes perde bo buelo 

ORANJESTAD (AAN) Fiscal Zamira Paesch, di Ministerio Publico, den entrevista cu DIARIO a menciona e hecho cu Pasco Grandi ta yegando y cu hopi hende ta bay biaha, y CEA ta bezig tur dia cobrando boetnan bieu.

  “Prome cu esaki pasa y CEA ta bin busca bo, bo lo a haya tres carta, por lo menos, di Ministerio Publico: ‘kennis geven’, un prome y un di dos advertencia, Dus, pa nan yega cu CEA nos lema ta sea bo ta paga of CEA bisa bo ‘bo tin un suma di boet habri, bo tin e chens pa paga full e suma aki, of bo tin cu sinta NA KIA e dianan cu ta ekivalente na 50 florin.

  “Tambe na Aeropuerto, nos partners di mas importante ta KPA y Grens Politie, unda tur dia nan ta haya un lista di personanan cu a yega na nan di dos advertencia caba, cu nan a haya diferente chens pa paga nan boet y nan no a hacie. E personanan aki ta wordo para na aeropuerto y nan tin cu paga esaki prome cu nan bay goza nan vakantie”, Fiscal Paesch a subraya.

   Esaki ta un momento fastioso unda cu grens politie ta hala e persona un banda, bis’e cu e tin un suma di boet pa paga. “E conseho ta  pa evita di yega asina leu, pasobra bo sa cu bo tin un boet habri, bo a haya tres carta alomenos di Ministerio Publico, Dus evita e experiencia aki na aeropuerto. Biaha cu bon cen y paga e boet prome cu bo yega aeropuerto”, Fiscal Zamira Paesch a reitera.

Un problema cu OM ta haya diferente biaha ta cu tin hende ta cambia di adres sin avisa nan. E ta keda na cada ciudadano di ta responsabel pa cambia su adres na censo, y OM tin e obligacion di manda e carta na e adres registra na Censo, y esey ta loke OM ta haci.