Esaki ta e di tres aña cu nan campaña di concientizacion den carnaval

Yvonne Bermudez di Comision Vision Pedagogico:

• No hiba mucha di 0-5 aña na carnaval 

ORANJESTAD (AAN) Señora Yvonne Bermudez, di Comision Vision Pedagogico Aruba, cual ta consisti di diferente instancia, manera Departamento di Asunto Social, Fundacion Respetami, Wit Gele Kruis, Fundacion Pa Nos Muchanan, y Tienda di Educacion, den entrevista cu Matutino DIARIO a bisa cu esaki ta e di tres aña cu nan tin e campaña di concientizacion, pa tene nos muchanan safe den e periodo di carnaval, y cu nan ta sumamente contento cu e reaccionnan cu nan ta ricibi.

   “Nos ta realiza cu trahando na concientiza, no ta un proceso cu ta bay lihe, pero cu ta tuma su tempo. Nos tin cu comparti e informacion y keda consistente pa e comunidad reflexiona riba e puntonan cu nan ta trece padilanti”, Bermudez a señala.

   El a expresa cu ainda tin e mensahe cu ta parce cu nan tin algo contra carnaval, pero si nan concientiza riba muchanan di 0-5 aña, cu ta nan mensahe principal, pa no hiba nan carnaval, nan ta haci cu e carnaval ta bay disparce.

   “Nos ta conciente, y mirando datonan di otro paisnan, cu esaki no ta bay ta e caso. Despues di edad di cinco aña nos por cuminza hiba e muchanan carnaval, y esaki, si ta den e mucha, si ta den e mayornan, y den parti di nos cultura, esaki lo no afecta ningun carnaval di mucha ni carnaval di hende grandi”, Yvonne Bermudez a señala.

   E Comision ta contento cu hopi mayor a contribui cu e encuestanan cu a wordo realiza aña pasa, basta conciente cu nan ta propagandando e punto cu no ta sano.

“Mayornan cu lo ta desea pa hiba e muchanan carnaval, laga nan experiencia con e ta, pero keto bay nos ta keda scucha y wak cu e sonido cu ta wordo poni den carnaval no ta e sonido corecto; nos ta wak e ruta cu ta demasiado largo. Nos ta conciente cu muchanan por disfruta di carnaval, pero nan por disfruta di esaki na un manera mas sano”, Yvonne Bermudez a indica.

El a sigui splica cu e grupo meta aki, di 0-5 aña di edad, varios di nan ta bayendo créche, Varios créche ta organiza un parada chikito na horarionan cu ta mas adecua pa muchanan chikito, e por ta un lugar paden, unda nan ta celebra cu musica, baliamento, y experiencia e sensacion di carnaval sin ta durante un parada largo den rutanan cu ta pa hende grandi”, Bermudez a señala.