Entre Mei cu Juni venidero lo dicidi si prolonga ciere of  habri definitivamente

Minister Presidente mr. Mike Eman, tocante frontera aereo cu Venezuela:

ORANJESTAD (AAN) Premier mr. Mike Eman, den entrevista cu Matutino DIARIO, a duna di conoce cu e tabata tin un reunion cu e director di e Departamento di Hulanda, cu ta dirigi tur aspecto cu tin di haber cu e proceso di Visanan.

   Durante e reunion e mandatario a puntr’e pa revisa pa Gobierno di Aruba, cu si en caso Aruba ta habri e frontera pa loke ta aerolineanan, si di parti di e Embahada cu tin cu bay maneha e visanan, si nan lo tin e capacidad pa haci esaki.

   “Nan a bisa mi cu e total di visanan cu nan tin na operacion pa handle awo, ta alrededor di 8 mil. Y nan tin alrededor di 5 mil, na e momentonan aki, cu ta wordo procesa”, Prome Minister Mike Eman a bisa.

Esaki kiermen, el a agrega, cu si e visa ta e unico hecho, sigur tin un espacio eynan pa por haci cambio den locual ta trata e hecho cu Aruba no tin conexion aereo na e momentonan aki.

   “E di dos ta keda e parti di e desaroyo socio-economico, y tambe di stabilidad politico na Venezuela. Y esey nos lo haya notificacion riba nan di parti di e departamentonan concerni, nos Departamento di Seguridad, y nos Departamento di Relacionnan Exterior, y tambe di Departamento di Relacionnan Exterior di Hulanda”, e dignatario a splica, y a señala cu ora gobierno haya tur e consehonan ey, nos tambe ta sinti pa bay den e direccion di habri e frontera, pero mester hacie responsabel y nos mester tin, tur esnan cu tin un pensamento riba esaki aliña cu e mesun idea cu ta un bon pensamento pa nos hacie.

   “Tin un meta, en todo caso, pa e claridad cu mi ta papiando di dje, cu nos kier haya pa Mei y Juni, e prolongacion cu nos a haci di ciere di e contacto aereo ta caduca, e ora ey nos tin cu dicidi si prolonga of no. Kiermen, pa mi rond di e fechanan ey di Mei cu Juni, e decision lo mester wordo tuma si ta  prolonga, of definitivamente, ta habri”, Minister Presidente Mike Eman a reitera.