Entre 2½  aña y 8 aña di prison exigi pa grupo meti den importacion di riba 400 kilo di droga

Ekipo sofistica a scucha tur combersacion

• Polis a gara nan cu man den mansa
• Caso a dura largo den Corte di Husticia 

ORANJESTAD (AAN): Riba Dialuna di mainta te den oranan di atardi, a dura pa tratamento di un caso grandi di importacion di droga. Un grupo di 6 homber a presenta dilanti Hues pa e caso di importacion di mas cu 400 kilo di droga banda di Vader Piet. Interesante tabata pa scucha con Polis a instala aparato special pa scucha combersacion den auto di e sospechoso principal. Esaki a haci cu a gara henter e grupo envolvi.

   Acusacionnan: E sospechosonan den e caso aki, cu ta hiba e nomber “Mazurca” ta e hombernan Venezolano: O.M.D. di 40 aña, J.A.N. di 42 aña, J.M.L. di 30 aña, I.C.A. di 30 aña, J.A.S. di 31 aña, y e Arubiano G.A.E. di 51 aña.

  Fiscal ta acusa e grupo di ta envolvi den importacion di cocaina y marihuana entre 17 y 19 Juli 2024, caminda 423 kilo di marihuana y 1.9 kilo di cocaina a keda confisca. Fiscal a bisa cu e sospechoso J.A.N. tambe ta worde acusa cu entre 13 December 2023 y 15 December 2023 a importa 235 kilo di cocaina y 238 kilo di marihuana. Fiscal a acusa G.A.E. cu riba 23 Juli 2024, tabatin un cantidad di pildernan Ecstasy (XTC) den su poder. E homber O.M.D. tambe ta worde acusa cu riba 18 Februari 2019, a purba mata e homber B. door di hink’e cu cuchiu den barica.

   Diescinco bulto di droga haya na Vader Piet: Hues a mustra cu segun e raport di Polis, dia 19 Juli 2024 na Vader Piet banda di e molinanan di biento, Polis a bin haya 15 bulto di droga. En total tabata 423 kilo di marihuana y 1.9 kilo di cocaina.

    Investigacion a resulta na detencion di e grupo aki. Hues a mustra cu Polis a keda vigila e beach y dia 20 di Juli 2024 a detene e hombernan O.M.D. y F.R. na e beach. O.M.D. tabata scondi den algun baranca mientras cu mas leu a bin haya F.R. ta cana.

   Den Corte M.D. ta desmenti di ta envolvi den e caso pero Hues a confront’e su declaracion na Polis. O.M.D. lo a bisa Polis cu el a bin ilegal cu boto. F.R. lo a declara cu e tambe a bin cu e boto y cu nan tabata busca droga riba beach.

   Cabezante di e droga ta nenga: Hues a puntra J.A.N. si e ta envolvi.  Pero J.A.N. a nenga di tabata envolvi.

  Hues a mustra cu na Polis, e sospechoso J.A.N. a declara cu un conoci di dje na Colombia a pidi’e pa busca hende na beach cu lo a bin cu boto. J.A.N. a percura pa J.A.S. y J.M.L. a bay na e beach pa busca.

   Aparato special a scucha tur cos: Segun J.A.N. e tabata na parke Arikok banda di Palo Marga, pa busca un hende cu lo a bin cu boto for di Colombia. Pero nunca e persona aki a bin.

   Hues a bisa cu Polis na forma discreto a pone aparato pa scucha combersacion den e auto di J.A.N., kende nan tabata vigila pa un tempo caba. A scucha combersacionnan tocante droga.

   Dia 17 di Juli 2024 a scucha J.A.N. tabata papia cu: “Awe ta e dia di biento. Esey lo yuda pa e cosnan yega tera. Lo mester warda riba e cosnan”.

   Pesey dia 18 Juli 2024 den oranan di marduga, J.M.L. lo tabata warda na beach pa e cosnan cu lo a worde tira den laman. Hues a sigui bisa cu G.A.E. a declara na Polis cu J.A.N. tabata e intermediador pa e droga yega. Ta asina cu e homber F.R. (Maracucho) tambe a bisa asina na Polis.

   Hues a mustra cu investigacion ta mustra cu J.A.N. a huur un Jeep pa core riba beach. Hues a bisa cu I.C.A. a declara cu mester a paga mas di 1 mil Florin pa e Jeep.

   Papia di lo “corona”: Hues a sigui cu J.M.L., kende ta nenga cu e ta envolvi. Sinembargo Hues a mustra cu tin combersacionnan scucha entre J.A.N. y J.M.L. Esaki tabata riba 17 Juli 2024, caminda J.A.N. ta bisa J.M.L.: “Awe ta e dia di biento”. “Awe nos mester haci’e”. “Pero no tin biento”. Ta papia di cu lo bin 6 cos y tur hende lo haya 3 y J.M.L. lo haya 4. Tambe cu J.A.N. a bisa cu J.M.L. lo bende facil y J.M.L. a bisa cu e no ta bay bende e porqueria ey.

   Hues a mustra cu tin combersacion caminda J.A.N. a bisa J.A.S. y J.M.L. pa bay busca riba beach. Por a nota cu ora Hues a confronta nan cu e combersacionnan aki, ningun a contesta ni reacciona nada.

   Hues a puntra I.C.A. si e tabatin e Jeep. Segun I.C.A., el a huur e Jeep pa 1.080 Florin pa 2 dia y tabata pa yuda J.A.N. Segun I.C.A., el a worde bisa cu ta usa e Jeep pa hiba hendenan ariba beach y despues busca nan. I.C.A. a sigui bisa cu J.A.N. kier pa e core e Jeep pasobra J.A.N. no kier pa hende mir’e ta core e Jeep.

   Hues a mustra cu tin combersacion entre J.A.N. y I.C.A., kende a bisa I.C.A. pa percura pa e Jeep pa 2 dia y cu I.A.C. mester a hiba algun hende 8’or di anochi na e beach y busca nan 5’or di mainta. Tambe tin combersacion entre J.A.N. cu un tal G.P. caminda J.A.N. a pidi pa bay cu su truck na e beach. Hues a mustra cu J.A.N. tabata papia cu I.C.A. di 700 cos cu lo yega y cu lo corona.

   Hues a puntra J.A.S. si e tin algo di haci cu e caso. El a bisa cu el a bay cu I.C.A. y J.M.L. den sero pa bay busca un hende cu lo a bin den boto di exterior. Hues a bisa cu tin combersacion cu tur cos lo a perde y cu un homber lo a hoga. Tambe cu a scucha J.A.N. bisa cu no ta bisa nada di cu 1 hende a hoga. Hues a mustra cu J.A.S. a papia: “si e hendenan bende e cosnan, nos lo corona”.

   Hues a bisa cu G.A.E. a declara cu e conoce J.A.N. El a bisa cu e ta usa droga y a paga J.A.N. 1200 mil dollar pa 5 liber di marihuana. G.A.E. a declara na Polis cu J.A.N. ta e intermediador di e traficacion di droga. El a bisa Hues cu e saco cu Ecstasy (XTC) cu a haya na su cas, ta pa su propio uso. El a bisa cu e marihuana cu el a paga pa haya, ta pa propio uso y su hendenan cu sa bin cerca dje, cu e sa yuda cu un poco marihuana.

   Droga na grapefield: Hues a bisa cu ta acusa J.A.N. tambe di a importa 253 kilo di cocaina y 238 kilo di marihuana, riba 15 December 2023 na e beach na Grapefield. Ta asina cu J.A.N. a nenga categorico. Hues a bisa cu segun e raport di Polis, dia 13 December 2023, Guarda Costa a haya informacion cu tin un boto cu lote grandi di droga biniendo Aruba.

   Riba Marine-Radar a mira un boto chikito lo tabata bandonando Aruba. A haci investigacion banda di Rincon caminda a haya 3 salba bida. A haya 3 ilegal ta cana y nan a bisa cu nan a bula for di boto. A sigui investiga y bao di algun mata a bin haya cantidad di bultonan di droga.

   Relacion cu esaki, Polis a instala aparato special pa scucha combersacionnan den e auto di e sospechoso homber L. Asina a bin scucha L. ta papia cu J.A.N. dia 15 December 2023 mainta. Nan tabata papia di mercancia cu a yega tera, cu tin Polis y toco toco.  (Polis ta sospecha cu “toco toco” ta significa, helicopter di Polis).

   Tambe a scucha nan papia di cu lo tin un tanki di gasoline ta drief. Esaki ta parce e mesun situacion cu a tuma lugar na beach di Grapefield. Hues a sigui bisa cu tambe Polis a scucha J.A.N. ta papia di un Jeep y cu cantidadnan cu lo a yega costa y cu e hendenan abordo mester bisa cu nan ta ilegal. Tambe cu mester kita e cantidadnan for banda di costa. Ta asina cu na Polis, J.A.N. a haci uso di derecho di silencio.

   Fiscal: Fiscal a bisa Hues cu Polis, despues di a haya informacion di plannan di importacion di droga, a instala aparato special den auto di J.A.N.

   Nan a scucha y graba tur e combersacionnan di J.A.N. pa cu e importacion di droga riba 15 December 2023 y 17 Juli 2024.

   Complice di importa droga: Fiscal a mustra cu durante 2 dia, tabatin buscamento di bultonan di parti di e grupo di J.A.N., despues cu esakinan a worde benta den laman na Vader Piet dia 17 Juli 2024. Dia 19 Juli 2024, Polis a haya e bultonan y un dia despues a detene 2 di esnan di J.A.N. cu tabata na beach pa mira si ta haya e bultonan.

   Investigacion ta mustra cu for dia 17 Juli 2024, nan tabata busca e bultonan di droga pero no a haya. Fiscal ta considera nan complice di importacion di marihuana y cocaina. Fiscal a mustra cu J.A.N. ta para riba cu e no a haci nada. El a bisa cu el a worde pidi pa bay busca hende na Parke Arikok y a manda dos hende.

   Fiscal a remarca cu e yamadanan cu Polis a scucha ta mustra cu for di Juni 2024, J.A.N. tabata papia di e importacion y a menciona nombernan. Tambe Polis a scucha J.A.N. bisa cu lo laga un Jeep hiba hendenan pa busca e bultonan. Fiscal a bisa cu algun di e sospechosonan mes a bisa cu ta J.A.N. a manda nan. Fiscal a bisa cu e ta considera J.A.N. e coordinador di e importacion.

   Exigi castigo: Fiscal a exigi pa O.M.D., 4 aña y 6 luna di prison, pa J.A.N., 8 aña di prison, pa J.M.L., 2 aña y 8 luna di prison, pa I.C.A., 2 aña y 6 luna di prison, pa J.A.S., 4 aña di prison y pa G.A.E. 4 luna di prison y pa lag’e liber.

   Hues, despues di a scucha declaracion di e abogadonan, a bisa cu e ta bay studia e caso y dentro di algun siman lo por spera sentencia.