Encuentro cu coredonan di Drift Madness enfoca riba desaroyo di motorsport na ArubaEncuentro cu coredonan di Drift Madness enfoca riba desaroyo di motorsport na Aruba

ORANJESTAD (AAN): Prome Minister Mike Eman a ricibi recientemente na Bestuurskantoor un delegacion di piloto profesional di drifting,

den un encuentro enfoca riba e desaroyo y futuro di motorsport na Aruba.

Entre e presente tabatin piloto internacional manera Chris Jackson, Ryan Kaufman y Bill Stenger, hunto cu talento local Jason Fun. Tambe tabatin presente Vice-Prome Minister y Minister di Deporte, Gerlien Croes.

E encuentro a tuma lugar despues di e evento Monster Motor Madness, unda e deportenan di drift a logra atrae atencion tanto local como internacional. Durante e reunion, e parti nan a intercambia pensamento riba e potencial di Aruba pa sigui desaroya motorsport como un actividad structura y sigur.

Prome Minister Eman a subraya e importancia di crea oportunidadnan pa hoben cu interes den deporte tecnico manera drifting, pero semper den un marco di siguridad y organisacion profesional.

“Nos kier duna espacio pa talento local por crece den un ambiente sigur y responsabel, mientras cu nos ta mira tambe con nos por posiciona Aruba como un destino pa motorsport den region,” Eman a expresa.

Durante e combersacion, tambe a menciona e necesidad pa infrastructura adecua pa drifting, mirando cu e deporte ta exigi espacio y facilidadnan specifico pa por practica na un nivel profesional.

E pilotonan internacionalnan a comparti nan experiencia y a expresa nan entusiasmo riba e potencial cu Aruba tin pa sigui desaroya e deporte aki, tanto pa competicia como pa atraccion turistico.

Gobierno di Aruba, hunto cu e sector deportivo, lo sigui explora posibilidadnan pa fortalece motorsport na e isla, cu enfoke riba siguridad, desaroyo di talento y oportunidad economico.