Educacion Personalisa pa alumno-atleta na Aruba a bira un realidad

Ministro Gerlien Croes a confirma

• Grupo di studiantenan di Juliana School ta uni cu AVB Academy 

ORANJESTAD (AAN): Ministro Gerlien Croes encarga cu Enseñansa y Deporte, a splica cu hopi entusiasmo nan ta lansa e proyecto di ‘Educacion Personalisa’, cu ta wordo diseña pa crea un balansa harmonioso entre enseñansa secundario formal y e desaroyo intensivo di talento deportivo pa hobennan na Aruba.

   Esaki a socede na Juliana School MAVO, y ta wordo haci hunto cu TDS, cu ta Talent Development Scheme di FIFA, cu asina a yuda crea Arubaanse Voetbal Bond (AVB) Talent Academy, di cual Aruba ta e prome cu tin’e den Caribe.  Tabatey presente tambe oficialnan di Dienst Publieke Scholen, cabezantenan di Juliana School, y mayornan di un grupo di alumno, y muchanan cu ta atleta-deportista di loke ta AVB FIFA Academy.

   Segun Ministro Croes, esaki ta un paso mas den e compromiso cu Aruba su veld di educacion y e meta pa construi un entorno educativo mas fuerte, na bienestar di e generacionnan di awe y esnan cu ta bin den futuro.

   Loke e ta encera: Pa Ministro esaki ta un paso inovativo y un inversion di loke ta e futuro nobo di educacion, pero tambe un futuro cu por crea hopi mas oportunidad pa nos deportistanan na Aruba.  Ministro a splica cu e ta un etapa nobo na Aruba unda cu nos ta crea e espacio den e sistema regular di educacion cu nos tin pa nos hobennan, nos muchanan por tin e oportunidad pa crece como deportista, como atleta den combinacion pa loke cual ta nan estudio tambe.

   Na Aruba pa algun aña caba ta sinti e necesidad pa flexibilisa e sistema educacional na Aruba. Flexibilisa den e sentido cu no solamente  mester pensa diferente, innova, pero alabes tambe personaliza educacion. Duna e alumno y e mucha un oportunidad unda cu e por no solamente studia, pero tambe sigui su soñonan y crea e espacio pa desaroya su talentonan.

   Riba tereno educacional na Aruba, scolnan priva a tuma e iniciativa aki caba unda cu hopi mayor, principalmente mayornan di deportistanan local, ta escoge pa toch haci un cambio. Pero no por ta asina cu Aruba no ta dispuesto pa sali di e comfort zone y purba toch algo nobo den e sistema educacional.

   Awor cu directorado di Juliana School, a introduci un prueba caminda ta bay tin un grupo di deportistanan di Aruba su seleccion nacional di futbol hunto cu AVB y FIFA cu ta bay haci e start na un trayecto nobo den educacion na Aruba.

   Pa alumnonan: Esaki ta loke e nifica ta cu e alumnonan, aunque cu si nan tin MAVO, HAVO o VWO advies, ta haya e oportunidad pa haya e les personalisa y digital via licencia. Muchanan aki no solamente ta bay lanta mainta y bin scol pa studia, pero nan ta bay lanta mainta pa entrena den combinacion cu nan estudio diario.

   Esaki ta un pensamiento y idea cu na Aruba a bin ta carga hopi tempo caba.  Awor a mira un momento oportuno na momento cu tabata den combersacion cu AVB y FIFA cu a inverti den un proyecto asina yama Talent Development Scheme na Aruba pa tres aña caba y nan tabata wak e necesidad cu nos sistema regular no por fit e grupo aki. Hopi di e deportistanan aki ta inicia un trayecto di futbol y ultimo un aña, dos aña ta mirando cu nan ta haya oportunidadnan pa nan por bay entre otro Hulanda pa nan por continua ayanan cu nan trayecto futbolistico, pero e aansluiting educacional no semper ta manera cu nos ta desea pa e ta, of si e ta mes, tin mayor tin preferencia cu por ehemplo nan por keda toch studia den e idioma hulandes of e sistema cu nos nan ta custumbra cune caba.

   Gobierno no a duda ningun momento pa bisa: “Que hubo nos bay haci algo nobo pa Aruba?” Si esaki funciona, e intencion ta tambe cu nos ta bay expande e proyecto aki na mas scol na Aruba e aña venidero. Esaki ta un inicio, manera nan ta yama un pilot, y Ministro ta gradici inmensamente na Juliana School, na nos cabesantenan, Stephany, etc., paso bin a ta combersa di e topico aki den varios reunion, pero si tin un scol cu tabata abrasa e proyecto aki den forma cu el abras'e, sin duda e momento tabata Juliana School MAVO.

    Juliana School no solamente a haci esfuerzo, pero a pone disponibilidad y e trayecto cu a ward’e encamina ultimo lunanan asina incentivo pa haci esaki posible.

   Cambio pa Aruba: Desde Diabierna 21 di Augustus, Aruba oficialmente tin un gepersonaliseerd onderwijs especialmente pa nos deportistanan den e caso aki.  Ohala cu e exito por ta asina grandi cu eventualmente aki cinco pa diez aña Aruba por bisa cu e ta e prome pais den reino cu a introduci gepersonaliseerd onderwijs na e forma aki.

   Hopi ta esnan cu kizas ta punta: “Okay, pero esakinan di unda nan con e ta bay? Nan ta alumnonan di Juliana, of nan ta alumnonan di FIFA, con esaki ta?".  Ministro a splica cu na comienzo loke nan a haci introduccion na dje ta alumnonan cu ta eigenlijk forma parti di Juliana School, pero nan ta haya un opleiding, un programa diferente cu e alumnonan regular di Juliana School den momento aki. Con nan dia lo bay tin e right, esey ta a base di e palabracionnan cu ta guard'e haci cu e coachenan di FIFA y AVB den cooperacion cu e scol.

   E muchanan aki por drenta nan tin nan propio lokaal, nan tin un facilidad na e compleho aki di un tereno di futbol cu nan por haci uso pa haci nan trainingnan, y nan tin un schedule di mainta te cu atardi. Parcialmente algun dia nan ta bay cas un tiki mas trempan, pero cu nan ta yega akinan y e sistema aki ta hasta ofrece cu si en caso tin alumnonan di e grupo aki cu ta escoge pa bishita un otro scol cu tambe ta ofrece un sistema personalisa, nan por bishita nan scol, haci e curriculo di nan scol, pero toch ta parti di e trayecto aki tambe.

   Despues e ta un grupo mixto.  Aruba tin un grupo cu ta bolbe e sistema personalisa manera cu ta ofrece nan, nan tin nan laptop, nan tin un licencia cu ta duna nan e les a base di nan nivel, o sea MAVO, HAVO, VWO, pero tambe si tin otro di e hungadornan cu ta bolbe un sistema externo, un sistema un curiculo diferente den un otro scol cu tambe tin e flexibilidad aki, e tambe ta sinta cu nan den loke cual ta e grupo aki.

   Esaki ta no solamente un cambio pa nos como gobierno, como pais, pero tambe pa nos docentenan na Aruba. Educacion ta exigi pa Gobierno inverti diario den loke cual ta no solamente financieramente y e structura di educacion, pero tambe den e hecho cu nos tin cu pensa kico educacion lo bira den e futuro pa Aruba.