The content originally appeared on:
Diario
Enseñansa pa Empleo ta instrumento basico pa profesionalismo
Trahador y comerciante mester prospera sin limite di domicilio
Wever-Croes a kibra atadura na refineria y habri porta di futuro
ORANJESTAD (AAN) Historia di economia di Aruba, a crea situacionnan cu a mantene nan mes for di introduccion di nan componente principal.
Esaki a hunga un papel importante den e perdida di oportunidadnan moderno cu Aruba tabata tin ora mundo ya a cuminsa traha riba cambionan economico basa riba realidadnan basa riba futuro.
Den persona di mr. Evelyn Wever-Croes, Aruba a conoce un gobernante, cu teniendo duro na e balornan di Arubianismo, no tabata tin miedo di adapta economia y e area productivo di trabou, na exigencianan moderno.
Clave den e maneho economico di Prome Ministro Wever-Croes tabata, cu el a hereda un Aruba cu politicamente a wordo ciega pa presencia di un refineria na e pais, na un momento cu mundo ya a duna inicio na transicion di energia.
Economia di Aruba tabata rehen di desaroyonan entorno di Nicolas Maduro, despues cu Mike Emana crece pa medio di e forma cu AVP a hunga cu e concepto popular cu Aruba mester di un refineria pa e existi.
Cu Gobierno Henny Eman mes a cuminsa traha riba desmantelacion di e refineria pa entrega Aruba completamente na turismo, a bay perdi den historia politico di Aruba, cu pa medio di Prome Ministro Nel Oduber a conoce entrada di refinerianan nobo cu, sinembargo no por a mantene nan mes habri.
Hunto cu Nicolas Maduro, cu Mike Eman a uza pa ehecuta su logo cu AVP ta bolbe habri refineria pa medio di Citgo, Mike Eman a comberti Aruba den rehen di Nicolas Maduro y Citgo.
Den e tempo cu Aruba mester a lucha pa confronta e desastre financiero cu Gobierno Mike Eman a crea cu su wega politico di “deshaci di BBO”cu nunca e por a realiza, Aruba a haya su mes envolvi den e desastre economico y social crea pa e proyecto Citgo.
Mike Eman a pusha Aruba contra un muraya sin salida cu e proyecto Citgo, cu no por a continua despues cu Mike Eman a haci cu cantidad di Arubiano a hinca nan mes den debe pasobra Citgo lo a duna nan trabou.
Den e situacion aki Aruba a conoce e determinacion di Prome Ministro Evelyn Wever-Croes cu a exigi Gobierno di Venezuela debolbe Aruba e yabinan di e refineria.
Intentonan a wordo haci dor di Gobierno Wever-Croes pa introduci un refineria completamente nobo, pero ora esaki no tabata posibel Gobierno Wever-Croes a pone fin na pasado y a habri porta pa atraccion di industria basa riba gas, pero tambe e proyecto di hidrogeno den e caminata moderno di mundo pa reemplaza productonan petrolero.
Industria di petroleo tabata marca sector di San Nicolas cu den historia a bira mas o menos e “ciudad di refineria”na Aruba, cu tabata sostene e economia di Aruba mientras e totalidad di comunidad di “pariba di brug”tabata mas bien wordo mira como dependiente di industria petrolero cu mester tabata e unico factor hasta pa dicidi pa entrada pa comercio di Aruba, cu a sufri tambe pa situacionnan personal.
Habitantenan profesional di San Nicolas mester a bay traha na otro partinan di e isla y San Nicolas caminda nan mester a busca educacion cu mester a sostene nan desaroyo y hasta nan salud den caso extremo.
Esaki a afecta e bida social di San Nicolas cu durante gobernacion di Prome Ministro Evelyn Wever-Croes a conoce un epoca nobo, cu awor ta culmina!
E integracion nacional total tabata e factor importante den gobernacion di Gobierno Evelyn Wever-Croes, cu a percura pa entrega na San Nicolas e integridad nacional Arubano.
Sumamente importante pa bida di e Arubiano biba pariba di brug, tabata introduccion di Imsan, cu a pone un fin na dolor y angustia di hopi ciudadano.
Na mes momento a cuminsa cu e diverificacion di economia na San Nicolas, cu asina ta haya ramonan nobo di empleo cu ta haci, cu e Arubiano cu a nace na San Nicolas no mester muda pa otro parti di e isla pa e por traha mas cerca di su trabou.
Diversificacion y adaptacion di San Nicolas na situacionnan mundial moderno pa medio di e maneho di Gobierno Evelyn Wever-Croes a habri porta pa entrada di diversificacion economico cu a adapta economia y asina bida social na San Nicolas na e era mundial moderno.
San Nicolas durante gobernacion di Evelyn Wever-Croes a bira parti integral nacional di Aruba, caminda hobennan cu kier prepara nan mes pa futuro cu ta presente na San Nicolas tambe, por goza di oportunidadnan presenta pa Enseñansa pa Empleo pa asina haya trabou den ramonan economico presente awor na San Nicolas, ta duna seguridad cu San Nicolas ta parti di Aruba na un forma integral.
Na un forma planifica, Gobierno Evelyn Wever-Croes a crea un Aruba uni, cu diversificacion rond Aruba pa asina sostene e caracter nacional y identidad Arubano pa tur Arubiano y tur sector, cu mester ta funciona na bienestar di e Arubiano sin distincion!
