E veredicto di e lucha pa Integridad di Evelyn Wever-Croes!

No ta Florin pero Lucha contra Corupcion a dicidi pa eleccion 2024

• Kico haci cu corupcion ta diferencia entre lidernan MEP y AVP
• Sinceridad Gerlien Croes riba su salida di AVP awe na prueba 

ORANJESTAD (AAN): Pa analisa e resultado di eleccion 2024, Aruba no solamente mester mantene su bista fiha riba e forma cu mr. Evelyn Wever-Croes hunto cu su team, a logra scapa Florin Arubano directamente.

Tin varios factor cu ta entrega e prueba, cu e medidanan fuerte di mr. Evelyn Wever-Croes riba tereno di placa, no a bira su rechazo pero hasta confirmacion di sosten di Pueblo den maneho di Aruba.

Na 2021, eleccion a duna prueba di sosten y confianza di Pueblo di Aruba na mr. Evelyn Wever-Croes, cu a gana eleccion despues cu el a tuma ya cantidad di medidanan pisa pa Aruba por a sigui dilanti despues di e abuso cu Mike Eman a haci cu placa di Aruba.

Pa scapa tanto e bienestar financiero di Aruba pero tambe tur loke ta destrui posibilidadnan pa adelanto di un pais, e maneho di Prome Ministro Wever-Croes tabata directamente basa riba e medidanan cu mester a wordo tuma contra e amenaza di corupcion cu a destrui democracia na Aruba.

Den e maneho di Gobierno Evelyn Wever-Croes 2 ta mira e forma acentua, cu Wever-Croes ta bay contra corupcion y ta para firme contra infiltracion di corupcion den su sistema di gobernacion.

Manera por a spera a base di resultadonan internacional ora gobernantenan crea muraya contra corupcion, Evelyn Wever-Croes a crea un grupo nobo di enemigo den e forma cu el a para riba un maneho basa riba integridad, cu ta nifica directamente moral y decencia di un Pueblo.

Den su maneho Prome Ministro Wever-Croes a pone e base directo pa por castiga, abuso di placa di e pais pa por favorece e gruponan cu por paga pa corupcion.

Kico ta nifica corupcion sin duda a bini dilanti den e Caso Avestruz, cu no ta e prome caso den e cadena di casonan di corupcion cu partido AVP a produci.

E surgimento di Mike Eman na inicio di e prome 25 añanan di Siglo 20, tabata directamente despues cu e grandinan di AVP a wordo condena dor di Huez pa Caso Fondo Desaroyo Nobo San Nicolas y Henny Eman a sali liber pa un letter den e procedura.

Corupcion a briya den e maneho di Mike Eman, cu a destrui Florin di Aruba cu introduccion di e medida popular di mitar BBO despues cu na entrada di BBO otro tipo di belasting cu tabata percura pa placa di Aruba, ya a wordo ahusta.

Mike Eman mes a admiti cu e e loke el a uza pa cumpra curazon di Pueblo, tabata contra interes di Aruba.

Algemene Rekenkamer di Aruba, maximo tribuna financiero di Aruba, a demostra con Mike a destrui Aruba cu proyectonan PPS, cu a favorece un grupo grandi na Aruba pero cu nombernan cu a keda desconoce.

Caso Avestruz ainda no a termina pero Benny Sevinger a keda den Parlamento loke a conduci directamente, manera e mes a expresa, na salida di mr. Gerlien Croes, kende semper tabata cana como sombra di Mike den AVP.

Cuanto miembro di AVP a wordo condena dor di Huez pa corupcion? Con corupcion ta abusa di placa di Pueblo y con e ta destrui e derechonan directo di ciudadano?

Esaki ta e preguntanan cu Mike mester a contesta pero a cera su boca y hasta a duna sosten na criminalidad ora el a mustra cu e no ta Evelyn y cu e ta sigui sostene Benny Sevinger, cu Pueblo ta paga te awe pa su estadia di Parlamento.

Durante e eleccion directamente despues di pandemia y medidanan impopular cu Evelyn Wever-Croes mester a tuma, Pueblo a sostene Evelyn Wever-Croes, cu a mantene su firmeza pa bay contra corupcion cu ta e desastre mas grandi na Aruba.

Introduccion di reglanan pa integridad di Ministernan a wordo introduci dor di Prome Ministro Evelyn Wever-Croes, cu a wordo persigui dor di Oposicion di Aruba, cu a trata na tur forma lastra su nomber pero no a logra.

Awe mr. Gerlien Croes mester dicidi si e ta bay forma parti di AVP, caminda el a bisa cu e no ta sinti su mes na su lugar y tambe partido pa cual el a bira lomba ora como delincuente sentencia, Benny Sevinger a keda den AVP.

Un momento historico a wordo produci pa Pueblo di Aruba, cu mester comprende cu Husticia ta haci su mes.

E maneho di mr. Evelyn Wever-Croes a haci cu awe Mike Eman por bolbe gobernacion cu e mester a bandona, ora el a laga Aruba cu hamber y sin placa y prueba con corupcion ta abusa di democracia.

Futuro lo huzga loke ta pasa awe. Un futuro den cual sin duda mr. Evelyn Wever-Croes lo por sigui gana su placa, pasobra contrario na mr. Mike Eman, e si sa kico crea un carera profesional independiente cu no ta exigi pa e tene duro na e caha di placa di Pueblo, cu tabata e fuente di entrada pa un parti grandi di bida di mr. Mike Eman dor di 1986!

Kico den man di Mike lo pasa cu e Ley di Integridad, ta keda e pregunta grandi di democracia na Aruba, cu a produci e trampa di placa!