The content originally appeared on:
Diario
Ernesto Kross, director di AFTA:
*Investigacion riba mercado alimenticio
ORANJESTAD (AAN) –Ernesto Kross, Director di Aruba Fair Trade Authority, a sigui elabora, den conferencia di prensa di Diamars di e siman aki, riba e structura di e mercado alimenticio na Aruba.
Esaki a base di un investigacion di prijs y structura di e mercado aki, cu AFTA a haci.
“Nos ta wak ken tur ta tuma parti den e proceso pa un producto di afo por yega na supermercado na Aruba. Loke nos ta ripara akinan ta cu e ta un structura complica. Tin hopi actor y companianan cu ta importa. Tin nuebe cu por tin influencia riba prijs. Cuminzando pa esun exportador, despues bo tin e compania cu ta trece e producto na Aruba, cu ta bay bira un liña maritimo cu container, y nan mester tin un boto pa por yega Aruba. Un compania asina ta traha cu hende maritimo, esaki ta e di tres schakel den e cadena, nan ta representa e compania cu tin e boto, na Aruba”, señor Kross a indica.
El a agrega cu despues ta bin un agente di Aduana. Aduana tin un rol hopi importante, y tin formulario, leynan cu mester tene cuenta cu ne.
“Hopi supermercado ta uza un agente di Aduana pa yuda nan den e parti administrativo eynan. Despues, nos tin e haven-dienst, e waf, cu na Aruba nos tin un so. Esey ta e compania cu ta haci mantencion na waf, cu ta APA, y nos tin e stibador cu na Aruba tin un so tambe, cual ta ASTEC, cu ta haci e carga y descarga”, señor Kross a menciona.
El a agrega cu ta importante pa menciona cu na Aruba hopi comestible tin impuesto.
“Tin e empresanan di transporte, companianan cu ta haci algo pa e supermercadonan. Hopi biaha e supermercadonan tin nan mesun magazine, pero ora tin mas producto nan ta huur y uza otro compania di transporte. Y eynan tambe tin schakel cu ta primi riba e prijs. E ora ey tin otro partido hopi importante cu ta e ground handling di e importadornan. Nan tin contrato cu e importado pa productonan por yega Aruba. Anto despues tin e detayista mes. E supermercadonan cu ta drenta busca nos productonan”, señor Kross a señala.
Kiermen, tin basta compania cu tin costo y nan ta primi riba e prijsnan. El a subraya cu un di cosnan importante cu por wak riba e structura, ta cu nos tin un sistema di BBO cu ta acumulativo, y si tin diferente compania of partidonan cu tin cu cobra BBO, e por bira BBO riba BBO, y e por bira mas. E por bira hopi, y esaki ta algo cu nos a ripara cu ta un problema den e prijs” señor Kross a duna di conoce.
El a bisa cu e di seis conclusion cu AFTA a saca e preocupacion cu nan tin, cu tin tanto cos den e cadena, pero solamente un liña ta yega di Merca te Aruba. “Anto, eynan nos ta preocupa si tin suficiente competencia. Tambe nos a wak cu tin un compania di waf y un compania di stibador, cu nos ta comparando prijs cu otro pais, y e preocupacion ey no ta mucho grandi, pasobra nan tin prijs toch competitivo. Pero e parti unda tin un container line cu ta haci full e trayectoria di Merca pa Aruba, esaki ta algo cu nos kier sigui wak di dje”, señor Kross, director di Aruba Fair Trade Authority a conclui.
