E incinerator lo ta functional pa mita di maart e aña aki

Director di Utilities Aruba NV, Joseph Everon:

ORANJESTAD (AAN): Recientemente Aruba Wastewater Sustainable Solutions (AWSS) a brinda informacion di e incinerator nobo y e maneho nobo. Director Joseph Everon, a remarca den un entrevista cu DIARIO, cu esaki ta proyecta pa ta funcional pa mita di maart proximo.

El a indica cu lo cuminsa procesa e 70 containernan di desperdicio medico cu tin pa mas di dos aña caba. Esaki, segun señor Everon, lo tuma mas o menos cinco pa seis luna pa proces’e, mientras ta procesa e desperdicio cu ta drenta diariamente pa asina mantene e standard pa manera cu e desperdicio drenta, procesa esaki di biaha.

Segun señor Everon, e proceso aki no lo tin consecuencia malo pa e bario pasobra ta trata di un proyecto na unda cu a tene cuenta cu e controlnan di emision den e sistema cu no lo afecta medio ambiente den e bario, kiermeen lo no tin holo malo tampoco, cu ta e meta principal.