E hecho cu dos agente policial a basha 18 bala riba un hoben bao ningun circunstancia ta hustificabel

Parlamentario fraccion PPA, Otmar Oduber:

*E no ta compronde pakico nan no ta deteni

*Ta cuestiona actitud di Ministerio Publico den e caso aki 

ORANJESTAD (AAN)-- Biniendo un rato riba e tragedia cu a sosode cu e hoben cu a fayece despues cu dos agente policial a los 18 bala den su curpa, Otmar Oduber a haci un fuerte declaracion, pasobra e ta considera cu e hecho aki no ta hustificabel y cu e dos polisnan no ta deteni.

Na prome lugar, Oduber a comenta cu Ministerio Publico no a presenta den e reunion unda cu a wordo yama pa nan ta presente, relaciona cu e sucedido aki.

            “E organo di mas halto di Aruba, hefenan den e caso aki di gobierno di Aruba, ta yama un Instituto cu ta Ministerio Publico bin aden, hunto cu Cuerpo Policial, SPA y e Minister, pero OM simplemente no a bin. Pa mi, un falta di respet total pa comunidad y pueblo di Aruba. Pero si bo t’ey pa sali pafo pa crea tur tipo di menaza, intimidacion, ora hende kier expresa pensamento y opinion riba un sucedido cu no ta bon!

            “No por hustific’e bao ningun circunstancia, cu un hoben ta perde su bida na man di dos agente policial, cu 18 bala tira den su curpa, no tin hustificacion! No matter si e hoben aki por a comete algo, por a mira algo, por a sa di algo, por a comporta su mes na un forma no debido, 18 bala no ta hustifica loke a tuma lugar un luna pasa, y pesey nos ta adresa esaki awe”, Parlamentario Otmar Oduber, Lider di PPA, a remarca fuertemente.

            E parlamentario a sigui bisa cu Diabierna ultimo tabata tin un accion unda a wordo entrega na Presidente di Parlamento un manifiesto, cu e ta contento di a mira den dje, entre otro, cu mester a tuma lugar test psicologico, test di droga, y cu Ministerio Publico a actua na un forma no transparente. “Como miembro di Parlamento, nos no ta pidi ningun informacion di e onderzoek, pero si nos kier sa kico ta e protocolonan cu tin, cu ta aplicable den casonan similar, no investigacion. Con ta posible cu dos hende di KPA cu tabata presente ta tira contra un ciudadano cu a perde su bida, kiermen no tin ni un testigo mas, pero e dos personanan aki no ta wordo ‘aangehouden’, separa for di otro pa evita cu bo ta mancha e investigacion cu mester tuma lugar. Ni un hende por compronde, anto ora bo yama Ministerio Publico aden, pa contesta riba e preguntanan aki, simplemente bo no ta haya contesta”, Lider di PPA, Otmar Oduber a señala.