E economia Arubano a crece 7,7% durante prome mita di 2024

Segun Banco Central

ORANJESTAD (AAN): Banco Central di Aruba (CBA) a publica e “State of the Economy” pa e prome mita di 2024. E publicacion aki ta toca desaroyonan economico na Aruba y den exterior.

   E economia Arubano a crece cu 7,7% durante e prome mita di 2024 si compare cu mesun periodo di 2023. Turismo a keda e contribuyente principal na e crecemento economico, unda e cantidad di turistanan “stayover” a aumenta cu 19,0%. Aunke turistanan a keda mas cortico na Aruba, nan a gasta mas pa anochi y lagando Afl. 2,2 biyon atras. E suma aki ta inclui solamente locual a wordo registra na banconan comercial.

   E prestacion positivo di turismo a stimula tambe mas consumo.  Por ehempel, importacion di producto (kitando esunnan pa inversion) a aumenta cu 6,8%. Similarmente, otro indicadornan di consumo manera fiansa personal, consumo di electriciad, y pagonan via e sistema di I-Pago tambe a mustra un crecemento. Ademas, gobierno su entrada for di impuesto a beneficia di e prestacion fuerte di turismo, mientras cu mehoracion den mercado laboral y aumento den actividad economico a empuha casi tur e componentenan di entrada di impuesto.

   Pa acomoda e aumento den e cantidad di turista, tin inversion andando den e sector hotelero. Sinembargo, no tur indicador di inversion a mehora durante e prome mita di 2024. Indicadornan cu a nota un caida ta inclui importacion di material pa construccion y e balor di hipoteca comercial nobo. Di otro banda, tin aumento den e balor di hipoteca di cas nobo y permiso pa construccion.

   Den e prome mita di 2024, mas placa a drenta Aruba su economia cu a sali (por ehempel, placa ta drenta via exportacion di turismo y ta sali via importacion di producto). Esaki a resulta den un surplus riba e balansa di pago cu a aumenta e reservanan oficial di CBA te na Afl. 3,0 biyon y e reservanan internacional te na Afl. 3,5 biyon na fin di juni 2024. Consecuentemente, e nivel di divisas a permanece ampliamente adecua y ta sostene CBA su trabou principal di mantene e balor di e florin.

   Prijsnan a subi den e ultimo 12 lunanan compara cu durante e 12 lunanan anterior. Den e periodo di juni 2023 te cu juni 2024, prijsnan a aumenta cu 1,7%. E tres componentenan cu a contribui mas na e inflacion aki ta comunicacion, vivienda, y cuminda. Ademas, si compara juni 2024 cu juni 2023, prijsnan a subi cu 2,4%. Ta monitor inflacion pasobra esaki tambe ta relevante pa mantene e poder di compra di e florin, y CBA lo sigui vigila e desaroyonan di cerca.  E publicacion completo ta disponibel riba e website di CBA.