E diferencia ta cu e gobierno aki si ta scucha y responde na pueblo

Parlamentario AVP John Hart:

• Refiriendo na e constelacion di ministerio 

ORANJESTAD (AAN): Parlamentario di AVP, John Hart, a presenta su punto durante e debate parlamentario, unda el a resalta cu, mas cu critica y discusion politico, loke realmente ta conta ta si gobierno ta atendiendo cu e necesidadnan di e pueblo Arubiano.

  Segun Hart, “nos por scucha hopi papiamento, pero na final di dia, gobierno mester responde na e yamada di sirbi e pueblo aki.” El a indica cu, ora un gobierno ta realmente cerca di su pueblo, esey ta bira visibel den decisionnan concreto y accionnan cla. El a menciona varios ehempel reciente, manera e restauracion di salario pa maestronan, e medidanan social pa duna alivio na conciudadanonan cu ta pasa dificultad, y e respuesta rapido na e demanda di pensionadonan pa reforsa nan poder di compra, despues di hopi aña di espera.

   Hart a reconoce cu ningun gobierno ta perfecto y cu e Raad van Advies tin su rol importante di critica y supervision. Sin embargo, el a pone enfasis riba e hecho cu critica di Raad van Advies no ta algo nobo. Na 2022, durante gobernacion anterior di MEP/RAIZ, e entidad a formula critica serio riba e structura di ministerionan, e reparticion di cartera y e desbalans den ehecucion presupuestario y e Landspakket cu Hulanda.

   “Critica tabatin tempo aya y critica tin awe,” segun Hart. “Pero na final di dia, gobierno y coalicion mester cana nan caminda y responde cu responsabilidad.” El a enfatisa cu e gobierno actual a cuminsa cu esey, door di duna contesta na pregunta di parlamento den proceso di toma di decision.

Parlamentario Hart a yama pa un reflexion di madurez politico. Den su palabra, diferencia di opinion ta natural den un democracia, tanto den coalicion como den oposicion. Oposicion tin su rol pa opone y critica, pero esey mester ta cu contexto y memoria historico.

Finalmente, Hart a expresa su confianza cu e decisionnan cu gobierno ta tuma awe, incluyendo anuncio reciente riba cambio importante den politica di vivienda pa 2026, ta den direccion di restaura confianza den comunidad y duna bek na e pueblo loke por a wordo descuida den pasado. “Nos mester wak gobierno bek den pueblo, y awe, nos ta wak esey,” el a conclui.