E di dos Mini DAS Clinic cu enfoke riba protocolnan transmural

Meta pa logra acuerdo oficial entre docter di cas y specialista

ORANJESTAD (AAN): Den fin di siman a tuma luga na HOH Academy e di dos mini DAS Clinic, esta e Dutch Antillean Southamerican Clinic den version mini, organiza door di dos internistanan di HOH, esta dr. Sandro Waterloo y dr. Bert Rodenburg.

   E evento aki ta conta cu participacion di diferente specialismo den cuido medico, docternan di cas, praktijkondersteuners, enfermeronan specialisa y demas profesional den cuido pa asina keda up-to-date.  Recientemente docternan di cas y specialistanan a yega na un acuerdo pa loke ta tratamento y referencianan di pashent. Y durante e dia aki a enfoca mas profundo den identifica ki tipo di pashent ta pertenece na cua liña di cuido. Na final esaki ta mas eficiente y na bienestar di e pashent y comunidad di Aruba completo.

   Bert Rodenburg, internista y infecciologo na HOH, a duna di conoce cu e intencion di e acuerdo aki ta pa clarifica cua pashent ta bay docter di cas y cua pashent mester bay un specialista. E meta ta pa haci uzo mas eficiente di cuido medico na Aruba. Hopi biaha e pashent por keda na su docter di cas pasobra e docter tin e protocol pa duna e tratamento necesario of despues di tratamento na specialista e pashent por bay bek su docter di cas pa sigui cu control. E pashent asina lo tin mas accesibilidad na cuido, banda di un reduccion di gastonan di AZV.

   Durante e dia tabatin presentacion riba diferente area di specialisacion medico entre otro nefrologia, ortopedia, cardiologia, oftalmogia, medicina interno, urologia y mas. Mayoria presentacion tabata den man di specialista hunto cu’n docter di cas pa papia tocante e protocolnan.  Meta tabata pa duna  clarificacion di e protocolnan y a papia di diferente ehempel di tratamentonan cu docter di cas mes por haci y con por mehora e colabracion.

   Pa docter di cas, Dennis Rasmijn, e acuerdo aki a cay den masha bon tera cerca e docternan. E ta contento cu por a reuni pa hunto papia tocante protocolnan pa uniforma e sistema y hacie mas eficiente. Dr. Rasmijn ta aprecia di a haya mas informacion tocante con e protocol ta hinca den otro, pa siña di otro y keda na altanto di desaroyonan pa bienestar di e pashent.

   Nefrologo di HOH, Hardjit Kharagjitsing, a expresa cu e DAS Clinic ta un bon plataforma mirando cu e ta un brug entre cuido di e prome y di dos liña. Esaki ta hopi importante pasobra mas colaboracion tin den cuido medico, miho por organiza e cuido tanto riba termino cortico, como tambe a termino largo. Di e manera aki por brinda un miho cuido na e pashentnan cronico, cu un maneho mas cla entre e specialistanan y e docternan di cas.

   Un dia hopi interactivo y cu e meta primordial pa tur esnan cu a participa a siña di e protocolnan cu alfinal lo hisa e eficiencia y calidad di cuido medico na Aruba.  Ta gradici tur orador, Hospital y parti di e team di organizacion pa e trabao duru pa por a logra haci esaki posibel un biaha mas.