E desigualdad salarial aki ta wordo coregi

​

Minister Glenbert Croes tocante salario minimo:

ORANJESTAD (AAN):   Minister Glenbert Croes a duna di conoce recien cu entrante januari 2025 salario minimo ora lo drenta na vigor. El a bisa cu actualmente e salario minimo ta Afl.1986.20-.

            E esencia di e cambio den e ley cu ta proponiendo cu ta introduccion di salario minimo pa ora ta haci cu un coreccion cu ta haciendo den e calculacion di salario minimo pa luna pa hacie semanal. Antes tabata tin un coreccion cu tabata uza un factor di 4.288. Nan mester a corigie pasobra tabatin un fout den e ley cu ta data for di añanan 70.

            E factor aki a wordo haci na 4.33 y esaki ta haci cu e ahuste di e salario minimo a base di 40 ora pa siman ta bira di Afl. 1986,20- pa Afl. 2007.05.

            Esaki kiermen cu un persona cu tabata traha 40 ora pa siman, door di e coreccion di e factor, e ta subi cu Afl. 20.85, e mandatario a indica.

            Sinembargo a laga sa cu e esencia di e ley aki ta cu un persona cu ta traha 45 ora pa siman ta ganando e mesun salario minimo cu e personanan cu ta trahando 40 ora. Esey ta e parti inhusto cu kier coregi.

            “Si bo ta traha 40 ora bo por gana Afl. 2007.05, pero si bo gana 45 ora door cu awor salario minimo ta wordo calcula pa ora, bo ta bay gana 45 maal e factor cu nan ta calcula pa e salario minimo, e ora bo ta traha 45 ora y bo ta bay gana Afl. 2247.93”, e mandatario a expresa.

            El a agrega cu dos aña pas, expertonan di Ministerio di Labor a cuminsa traha riba dje. A constata cu den añanan 70 si un persona tabata gana entre 40 y 48 ora, ta gana e mesun salario minimo. Asina e tabata antes. Despues nan a bah’e pa 45 ora. Un dado momento a bisa cu ta papia di SDG’s caminda kier elimina desigualdad den mercado laboral pesey e ora mester tuma accion y haci e cambio responsablemente.

            A dura dos aña pa e expertonan studia e materia y bin cu un proposicion. Gobierno a tuma un decision aña pasa y tambe for di Parlamento tabatin mocionnan pa apoya e proceso aki te ora el a cuminsa cana su trayecto legislativo.

            Minister Croes a señala cu a tuma e decision pa Sociaal Economische Raad (SER), unda tin representacion tripartite di gremio sindical, comercial y gobierno, duna un conseho riba dje. E conseho en general di SER tabata positivo.

            Nan ta bisa cu aworaki un trahado cu ta traha 45 ora sa cu e ta bay wordo paga 45 ora. Y esaki ta demotivante pasobra si ta traha 40 of 45 ora y ta gana mescos no ta algo husto, a indica.

            E desigualdad salarial aki ta wordo coregi y e echo di gana segun e oranan traha ta bay motiva e trahado mas y e ta bay ta mas productivo.

            E preocupacion cu tin ta e impacto cu esaki por tin riba prijs. E ta sinti cu den sector comercial tin hopi sector cu ta consciente cu mester coregi esaki. E ta compronde cu tin cierto comerciantenan cu ta preocupa. Pero e ta spera cu hopi hende por comprende cu si ta traha 40 ora, bo lo wordo paga pa 40 ora y si bo ta traha pa 45 ora bo lo wordo paga pa 45 ora. Esaki ta husticia salarial, a enfatisa.