E aña aki atrobe DIP lo no divulga publicamente nombernan di Kavel

Maritsa Chiquito di DIP a confirma

ORANJESTAD (AAN): E sorteo pa asunto di Kavel a lo largo di ruta pa Carnaval 2025 lo bay sigui cu mesun reglamentonan cu a worde introduci aña pasa caba.  Esey ta loke Maritsa Chiquito di Departamento di DIP a indica na DIARIO.

   Loke e coordinadora di Team Carnaval di DIP ta referi aki na dje ta cu e Kavelnan a lo largo di Vondellaan y Lloyd G. Smith Boulevard a keda mescos.  Tambe e forma di proceder a keda mescos.

   Por corda cu na 2024, DIP a introduci un maneho di Carnaval y den dje realmente e cambio di mas grandi ta cu nan no ta publica e nombernan cu a gana Kavels, pa cumpli cu reglanan moderno di privacy y pa proteha nomber di hendenan.

   Esey lo bay keda vigente pa 2025 tambe, segun señora Quito a indica.  El a agrega cu e forma cu ta bay saca e nombernan lo keda mescos tambe, pues lo no tin cambio pa cu esey.

   E cambio di mas grandi pa pueblo di Aruba, ta cu e nomber di ganadornan lo no worde bisa ni publica.  Pues mescos cu aña pasa tabatin publico presente pa mira e sorteo, toch nan lo no “tende” e nomber di ganadornan worde menciona.  Nomber ta keda secreto pa Notario traha procesverbaal.

   Esnan cu kier busca Kavel, tin di bishita e website di www.dip.aw unda bo ta download e formulario di 2025, ta yena e informacion, ta pega un stampia (zegel) di 4 Florin na dje.  Stampianan aki ta obtenibel na Servicio Postal.

   Tur persona interesa pa aplica pa un kavel mester yena e formulario di peticion y entrega esaki na oficina di DIP. Horario cu lo saca e buzon na e loket di DIP den hal di InfraGebouw na Sabana Blanco ta di 7:30 am pa 4:00 pm.  Bo por download, print, y entrega cuanto formulario di peticion cu bo kier.  Djis cu cada uno mester tin e stampia di 4 Florin riba dje.

   Deposita e peticion den e buzon corespondiente na e loket di DIP den Hal di Infra Gebouw na Sabana Blanco 68.  Ultimo dia pa haci esaki ta Diahuebs 23 di Januari 2025.

   E sorteo pa Kavel di 2025 lo tuma lugar Diabierna 24 di Januari 2025.  Lo percura pa cada persona por haya un solo Kavel.  Otro persona cu tin mesun adres di cas, no mag di haya Kavel tambe pa Carnaval 2025.

   E ganadornan lo ricibi yamada di personal di DIP, y si acaso tin mester di mas informacion, lo pidi e ganador pa manda mas detaye via email pa nan.  E ora lo bay pone un fecha pa pidi’e pa bay busca su vergunning pa ora di busca vergunning, e ora nan por haci nan pago y ricibi e permiso.