Durante aña 2025 tin 130 yamada di melding menos cu aña 2024

Francis Toussaint di Brandweer Aruba:

ORANJESTAD (AAN): Durante e 356 dianan cu ya a pasa di aña 2025, Brandweer Aruba a ricibi 674 yamada di melding. Asina Francis Toussaint a duna di conoce den un entrevista recien cu DIARIO. E cantidad di yamadanan aki ta encera 78 yamada pa candela di edificio, den cas di e ciudadanonan aki. Un cu a impacta pueblo bastante, tawata esun na unda un señora a keda pega den su cas y a fayece. Y un otro caso tawata di un colega di Brandweer Aruba.

Pa loke ta trata candela di auto, tawata tin 36 yamada. Brandweer Aruba a ricibi 166 melding di Hulpverlening, esakinan ta encera asistencia na ambulance y accidente di auto. Y 394 melding pa candela di mondi.

Toussaint a remarca cu esakinan ta candelanan den henter aña incluso di Dera Gay pero durante e evento tawata tin asina hopi candela cu Brandweer Aruba a traha un rapport apart di e candelanan aki. El a expresa cu si mester a conta tur e candelanan ocaciona durante Dera Gay, lo e cifra ta hopi mas.

Den tur, segun señor Toussant, e aña aki tin 130 yamada di melding menos cu aña 2024. El a remarca cu e hecho cu e cantidad di yamada y candela a baha compara cu aña anterior, ta debi na conscientisacion di Brandweer Aruba riba nan paginanan social, nan ta mas activo den duna charla y tambe ta mas presente na scolnan rond di Aruba.