Dr. Derrick C Dabian ta principal inventor di e simulado di cirugia di wowo di ultimo generacion

Un docter di wowo Arubiano..

ORANJESTAD (AAN): Durante e studio di Dr Dabian como Oogarts na Universidad El Bosque na Bogota, e la mira e necesidad cu e studiante tin pa por hasi un simulacion di operacion di wowo y a crea un metodo novedoso, sencillo y futurista. El a presente na Universidad cu a acepta e proyecto di inmediato. Dr Dabian a forma su ekipo di investigacion cu a resulta na e simulado aki. Recientemente Dr Dabian a ricibi su reconocimento na su aporta di su Cas Mater Universidad Del Bosque di Bogota.

   E simulado di cirugia di wowo ta un dispositivo di entrenamento inovativo cu ta integra tecnologia avanza, manera e impresion 3D, cu ta ofrece un simulacion mas realistico y accesibel di anatomia humano compara cu metodo tradicional. E simulado ta facilita entrenamento cu wowo di cadaver di otro especie.

   Aworaki e forma di prepara un medico pa futuro ta enfrenta reto pa practica di e ciruhano pa procedimentonan compleho den un manera eficiente y sigur. Den e contexto aki, a desaroya e aparato di entrenamento pa cirugia di wowo cu tin e proposito pa transforma e manera cu e studiante ta desaroya su habilidadnan quirurgico.

  E focus nobo ta permiti cu e studiante por practica habilidadnan quirurgico den un entorno controla y repetibel, cu ta facilita un aprendizahe mas eficiente y sigur. Ademas, e aparato tin un patent di invento, cu ta resalta su inovacion y su potencial den e area di educacion medico.

   E caracteristicanan specifico e simulado tin:  Kico ta e caracteristicanan di e aparato pa mehora e experiencia di entrenamento cu wowo di cadaver? Tin hopi, pero e principalnan ta e precision anatomico cu a logra cu e aparato. E simulado ta permiti situa e wowo na posicion specifico cu ta refleha e anatomia humano, y ta yuda studiante pa familiariza nan mes cu un entorno quirurgico real.

   Tambe, e ta regula e presion intraocular cu e studiante por ahusta y optimiza pa haci procedimentonan quirurgico di un manera eficiente, mientras e aparato ta integra un mecanismo cu ta simula e resistencia y presion cu musculonan di wowo ta hasi durante cirugia. Esaki ta duna e studiante un experiencia mas cerca di loke nan lo enfrenta den un pashent real.

   E team interdisciplinario cu a desaroya e simulado: E projecto a envolvi diferente persona:

Dr. Derrick André Dabian, un medico ciruhano den Oftalmologia, kende a asumi e rol di cliente-inventor y usuario di e simulador.
Profesor David Andrés Cañon, un diseñador industrial y magister den Diseño y Ingenieria, cu a aplica su conocimento den diseño mecanico y impresion 3D.
Luis Estrada, cu a cuminsa como practicante y miembro di e grupo di investigacion pero cu awor ta profesor di e programa di Diseño Industrial. El a asisti durante tur fase di desaroyo di e projecto.
Juan Avila Forero, kende a contribui cu structura di e proyecto, den termino di tempo, recurso y maneho, aplicando su experiencia den modelo 3D cu maya poligonal pa e partinan organico di e simulado.

   Loke e patent di e aparato ta representa pa futuro: E parti aki, ta importante resalta e trabow di Oficina Legal di Inovacion y Extension (OLIE), awendia, hopi creado nan riba mundo por genera conocimento nobo sin necesidad di infraestructura grandi manera den pasado, danki na e globalizacion, y inversion di Universidatnan y democratizacion di tecnologia.

   Segun Dr Derrick Dabian e proceso di patent a dura mas cu dos aña, y dos aña adicional di investigacion y diseño. “Mester a hasi un buskeda global di tur patent di invento den paisnan cu tin hopi progreso den tecnologia.  Tur e tempo inverti den e proceso di diseño y haya e patent ta resalta e importancia di e simulador y e madurez di investigacion di e Universidad, cu tin e area di salud como un di su pilarnan. Mi ta sumamente contento cu mi por a ehecuta mi creacion y lague atras pa e studiantenan di Oftalmologia. Den actualidad mi ta parti di e Departamento di Investigacion di Universidad Del Bosque.”

   Riba e potret por mira d.r.p.d. Luis Estrada, Dr. Derrick André Dabian, David Cañón y Juan Ávila Forero.