Dos studiante a investiga loke bishitantenan ta laga atras como desperdicio den Parke

E ta un proyecto piloto

ORANJESTAD (AAN): Dos studiante di Universidad di Aruba, esta Jessica Ebbink y Julia van Duijn kendenan ta haciendo un minor den ‘Economia Circular’, awor nan ta tras di un proyecto piloto di maneho di desperdicio cu a cuminza awo den Parke Nacional Arikok.

   Nan proyecto a cuminza na Cueba di Fontein.  Via di e dos studiantenan di Universidad aki, nan a haci investigacion con pa reduci desperdicio, crea concientisacion y traha riba un modelo pa desperdicio circular.

   Esaki ta un colaboracion entre Universidad di Aruba y Hogeschool Saxion na Hulanda.  E investigacion di nan ta enfoca riba separacion di desperdicio, y nan ta mirando kico ta e posibilidadnan riba e isla pa por separa desperdicio na un forma circular.

   Nan meta ta pa por implementa e plan pa separacion di desperdicio den Parke Nacional Arikok.

   Alumno Jessica Ebbink a splica cu den ultimo simannan, e duo a haci un inventarisacion di e desperdicio den parke, y a bin descubri cu boter di plastic y bleki di aluminium ta e desperdicio cu mas hendenan ta benta afo den bakinan na e Parke.  Esaki nifica cu e bishitantenan na e Parke, nan mes ta bin cu mesun boter- y blekinan pa disfruta di dje den e Parke.

  Studiante Julia van Duijn a indica, cu pa medio di separacion di desperdicio, nan lo percura pa menos desperdicio ta termina na Sero Tijshi, y tambe nan por recicla diferente fluho di desperdicio y duna nan un segundo uzo.

   Esey ta e esencia di e proyecto piloto aki, pa mira y dicidi con ta e miho manera pa encurasha y concientiza comunidad pa separa nan desperdicio.  A base di esey, e studiantenan ta spera cu e areanan natural di Parke Nacional Arikok lo bay ta mas limpi.

   Despues di e investigacion a dicidi pa separa tres diferente fluho di desperdicio den parke, cual ta bleki di aluminium, boter di plastic, y resto di desperdicio.  Bao di ‘resto’ aki ta referi na e.o. material di glas, desperdicio organico, papel.

   Jessica y Julia ta invita tur persona cu ta bay bishita Parke Nacional Arikok pa benta bo desperdicio den e baki corecto.