Dos piroman deteni Diahuebs marduga na Noord

Nan a kima artificial turf di deporte

ORANJESTAD (AAN): Diahuebs marduga polis di Noord a bay altura di e veld di baseball na Noord situa pariba di Centro di Bario Noord. Eynan tabata tin un candela basta grandi, causando molester.

   Yegando e lugar, e agentenan atento den e patruya, a mira dos hende ta core bay.  E agentenan mesora a bay unda nan ta y a detene nan.

   Tabata trata di dos hoben di como 17 aña di edad.  Nan a purba di huy for di e veld cu tin net pariba di La Nuena Fondue Grill.

   Den nan poder, a bin haya artefactonan cu nan a uza pa cende candela.  Pues e dos hobennan aki aparentemente ta piroman, y e mas lamentable ta cu nan a kima un monton di yerba artificial.  E artificial turf aki ta esencial pa deporte, y ta costoso.

   Brandweer a presenta y mesora a cuminsa combati e candela, cu a causa daño enorme na e yerbanan.

Ambos hoben a wordo deteni y transporta pa warda bou cargo di vandalismo.

   Si acaso nan ta menor di edad, e ora ta e mayornan di e dos piroman aki lo tin di bay paga pa tur e artificial surf aki wordo reemplaza y cumpra di nobo.  Cartera di e mayornan lo bay pica sigur, considerando cu tin di paga contratista pa kita esnan bieu y instala esnan nobo.  Ademas e dos hobennan aki awo lo keda conoci como ‘piroman’ cada uno.