Dos chauffeur burachi deteni pa ocasiona accident semi-frontal na Tanki Leendert

ORANJESTAD (AAN): Diadomingo anochi polis y ambulance a bay poco pabou di rotonde di Tanki Leendert pa un accidente di trafico entre dos auto.

   E patruya di Polis cu a yega na e lugar net dilanti Petjes Restaurant, a bin nota cu ta trata di accident entre un auto sedan Renault Logan color blanco cu number A-25797 y un vehiculo SUV Ford Edge color blauw cla cu number A-44306.

   Polis a yega y a bay atende cu e chauffeurnan, y check nan storia riba loke a socede.  Ambos a haya golpi semi-frontal.

   E storia no tabata cuadra hopi, y ora cu a haci test di supla, e chauffeur masculino di e Ford Edge a sobrepasa e limite legal di alcohol, y mesora a keda deteni.

   Polis a atende tambe cu e persona femenino di e Renault Logan, y e tabata conta storia cu ta e otro vehiculo a bin dal den dje, y den e combersacion diripiente Polis a cuminza sinti holor fuerte di alcohol di uso interno ta sali for di su aliento.  Nan a haya esey raro, pasobra nan tabata tende storia di dje cu e ta na estado.

   Ambulance a yega pa asina check e muhe aki si acaso golpi por a ocasiona algo na su embarazo.  Pa sorpresa a bin haya sa cu e no ta na estado, pues a djis gaña polis cu cara seco eybao.

   Como cu e test di alcohol di e muhe tambe a sali malo, el a keda deteni.  Pues dos hende burachi a dal den otro, y na final ambos a keda deteni.  Pero a bin realiza si cu ta e muhe cu e Renault Logan a hala hopi na su man robez y dal frontal contra trafico di direccion contrario.

   Pa colmo, a bin haya sa na final cu e Renault Logan y tambe e Ford Edge no tin aseguro valido tampoco.