Docentenan na Colegio Arubano den accion awe

Nan ta sostene nan Rector Tim Croes

ORANJESTAD (AAN): Algo a socede Diamars, y esaki a pone cu docentenan di Colegio Arubano uni nan mes, y ta bay tene un accion awe na scol, y debi na esey lo no ta dunando les.

   Tur cos a cuminza Diamars atardi, ora un sucedido na Colegio Arubano den Vondellaan na Playa a escala, y aki na final a schors e Rector, esta sr. Tim Croes.

   Sindicato Simar a splica cu e situacion na Colegio Arubano pa basta tempo ta tenso.  E relacion di e Directiva di Colegio Arubano cu e docentenan no ta na un manera sano.  “E base di confianza cu mester tin entre e Directiva y personal no tey”, segun Simar.  Nan a mira con Diamars atardi e situacion a sali for di man.

   Segun e Sindicato, e presidente di e Directiva, den persona di sr. Ernesto Rosenstand, a haya ta bon pa schors e Rector, Tim Croes, sin cu tin un motibo valido.  Debi na esey, e docentenan na Colegio Arubano ta hopi disgusta cu e situacion cu ta reina na Colegio Arubano y ta desaproba tal actitud di e President.  DIARIO a compronde cu e docentenan ta duna nan sosten na e Rector.

   E consecuencia di e sucedido, a resulta cu gran mayoria di e docentenan a dicidi cu awe Diaranzon 19 di Januari 2022 e docentenan como protesta y muestra di solidaridad na e Rector, cu nan lo no duna les na e alumnonan.

   Pues awe lo no tin les pa HAVO ni VWO na Colegio Arubano na Vondellaan.

   “Nos ta lamenta cu e situacion nester a yega asina leu, pero mirando cu pa basta tempo no ta mira ningun mehoramento, e docentenan ta sinti nan mes obliga pa tuma tal decision.

   Directiva dl SIMAR, e Sindicato di maestro di Aruba, ta na altura e sucedido y ta para pa a interes di su miembronan cu ta labora den sector di enseñanza. Nan ta spera cu den tempo rapido por bin un solucion cu ta trece trankilidad pa asina por minimaliza e daño cu esaki por trece pa enseñanza na Colegio Arubano.