Docentenan di Colegio Arubano cu ultimatum pa Directiva di SVOA bay cas

ORANJESTAD (AAN): Diabierna merdia, e docentenan di Colegio Arubano a sinti cu ya nan no por sigui asina mas, y ta exigi pa henter e Directiva di Fundacion SVOA bay cas.

   Docentenan ta sinti cu tur e plannan di aña pasa pa mehora e sistema educacional, ta wordo poni un banda door di SVOA.  Esaki y mucho mas a pone cu e relacion entre docentenan y SVOA a cuminza deteriora.  Awor e problema a bay den un caida mas drastico, for di dia cu President di SVOA a suspende Rector Tim Croes.  Siendo cu hopi docente ta mira Croes como un di e catalizadornan pa bin cu cambio pa mehora enseñanza na Colegio Arubano.

   Esaki a bira tambe e punto cardinal cu Docentenan a haya cu SVOA a bay demasiado leu, y nan no tin confianza mas den e Directiva.  Nan a manda un carta pa exigi nan retiro.  SVOA na su turno ta acusa tur hende di kier a pinta nan negativo.

   Diabierna e situacion a empeora y docentenan a pone un ultimatum, esta cu Directiva di SVOA tin di bay cas!

   Un biaha mas nan tabata para pafo di tereno di Colegio Arubano cu pancarta den man.  Esaki ta e culminacion di e hecho cu desde aña pasa caba nan no tin confianza mas den maneho di SVOA, y e tempo aya hasta Obispado a purba intermedia, a manda representante y esaki a finaliza den un MOU di comprondemento entre Docentenan y SVOA.  Pero awor tur hende sa, cu SVOA no a honra e palabracionnan aki, ni cana e rumbo cu tabata stipula den e MOU.  Esey a culmina dia 18 di Januari 2022 cu e actitud di President Rozenstand cu a expulsa e Rector sin base.

   SVOA a manda un carta pa mayornan unda cu nan tambe a purba pinta e Docentenan den forma negativo.  Pero pa SVOA esey a sali nan por la culata, como cu mayornan tambe tabata sostene e docente y Rector.

   Diabierna nan a pidi Sindicato SIMAR tambe bay duna sosten.  Pasobra desde 18 di Januari 2022 e personal na Colegio ta trahando bao di presion y angustia.  E dia ey a manda un carta caba pa exigi retiro di e Directiva.

   Ta di lamenta cu net siman pasa ora cu Colegio Arubano ta pasando den retonan grandi, net e ora unda cu por a sinti sosten di Directiva di SVOA, cu net e ora ey nan tabata casi invisible.  Anto ora cu mayornan a bay entrega carta, tampoco ningun hende di SVOA no kier acepta esey, pasobra segun e President, nan “no ta papia cu tercera parti”.  Un falta total di respet pa mayor, pa alumno, y pa su cuerpo di docente.

   “Tene honor na bo mes, baha for di bo posicion como directiva y laga otro cu si tin interes di enseñanza na pecho, sigui cu e trabao,” ta loke Josephine Martilia di Simar a bisa.

   Docente nan exigencia ta pa haya respet, nan no kier mas intimidacion, ni mas menaza.  Tambe ta pidi respet pa e mayornan, y respet pa e alumnonan.  Ta bolbe pidi Obispado interveni, pasobra asina ta trece problema pa enseñanza di calidad.

   Te na ciere di edicion ainda no a haya informacion ki decision SVOA a  tuma.