Directora di DIMP ta splica kico ta e diferencia entre sistema di BTW y BBO

*BTW no necesariamente ta un sistema mas simpel

ORANJESTAD (AAN)—BTW-BBO ta e tema central di un entrevista aki cu, recientemente, DIARIO a realisa cu Directora di Departamento di Impuesto (DIMP), Luenne Gomes-Pieters.

            Luenne Gomes-Pieters a cuminza pa splica cu DIMP tin dos pechi. El a splica cu DIMP ta aconseha Gobierno ora ta trata di cambionan di impuesto, cambionan cu por sostene e presupuesto di Pais Aruba, teniendo cuenta cu e gastonan cu tin y e entrada cu por sostene esaki, pa por tin un finanzanan sostenible, y tambe un finanzanan publico cu ta den balansa. “Y den e cuadro aki y di Landspakket, na 2021 nos tabata tin diferente sesion caba y na comienzo di aña cu e team di Hulanda, ora ta trata di un BTW.

            Mester tene cuenta si cu algun aspecto: un sistema ta un escogencia di un pais; kiermen, tin hopi pais rond mundo, cu tin un sistema di BBO: ‘turn over tax’, sales tax, BTW y diferente tipo di sistema di impuesto indirecto.

            E escogencia cu un pais ta haci ta basa riba e situacion economico di un pais y tambe e simplesa di leynan fiscal. Un BTW no necesariamente ta un sistema mas simpel. Hopi biaha mi ta mira cu nos ta discuti esaki, mas awo cu nos ta den un trayecto di eleccion, BTW ta den boca di hopi hende. Nos mester puntra nos mes si nos ta compronde di berdad kico e impacto di un BTW ta”, Luenne Gomes-Pieters a señala.

            El a comenta cu e sistema di BBO berdad ta cumulativo, y esey ta un parti negativo di dje, pero e ta basta simple. Ora bo ta ricibi cash, loke bo ta ricibi na entrada ta cobra 7% BBO riba dje.

            “Pa haci e introduccion di BTW un tiki mas facil, e tempo eynan, e discusion tabata si nos bay over na un sistema di BBO na un sistema di BTW, tabata tin un par di temanan importante cu Gobierno mester a dicidi riba dje. Un di nan ta e tarifa. IMF ta recomenda un BTW sistema, cu tin un tarifa. E discusion e tempo eynan tocante e tarifa ta, ki tipo di tarifa, segun e calculonan, ta bay sostene e mesun entrada cu bo tin na BBO. Si mi no ta hera, e tempo ey tabata 12-12 y mey, pasobra nos tabata tin un BBO di 6%. Awo cu nos tin un sistema di BBO di 7%, e prome pregunta cu nos tin cu discuti ta, ki tipo di tarifa nos tin cu gobierno lo mester por sostene e mesun entrada na BBO”, Directora di DIMP, Luenne Gomes-Pieters a señala.

            Den otro articulo DIARIO ta sigui elabora riba e tema interesante aki.