Director Drs. Joel Rajnherc di ImSan a fayece dialuna marduga

Noticia tristo pa e gran famia di ImSan

• Aruba a perde un gran visionario cu a crea e Centro Medico poderoso aki 

ORANJESTAD (AAN): Siman a habri trempan cu e noticia tristo, ora cu tur empleado di ImSan na San Nicolas a wordo informa personalmente, cu nan Director stima, esta Drs. Joel Rajnherc a fayece marduga na Miami, Florida.

   Algun tempo pasa, Drs. Rajnherc a wordo diagnostica cu un tipo di cancer, y el a busca yudansa pa combati esaki.  Y e tabatin exito tambe!  Su cancer a wordo eradica, pero loke a pasa den fin di siman ta cu el a haya un complicacion, y esaki a bin fuerte y a ocasiona su morto.

   Drs. Joel R. Rajnherc a nace dia 6 di October 1949 na New York, y a studia e bunita profesion medico y a specializa su mes den Medico Pediatra.  For di tempo cu el a cuminza traha na Aruba, den un fraccion di tempo el a cuminza haya cariño di mama di tur pashentnan, specialmente pa e forma sumamente cariñoso cu e ta atende baby y muchanan.  Semper den Sala di Espera na su consultorio na Eagle, por tende mayornan ta papia y comenta ta con feliz nan ta cu nan yiu ta wordo atendi pa Drs. Rajnherc.

   Drs. Rajnherc simplemente tabatin e filosofia pa duna tur pashent e atencion digno cu nan merece.  Cu un yudansa cariñoso, ta stimula tur pashent pa recupera mas rapido.  Y su pensamento di e cuido medico y trato di pashentnan, no a djis keda den su pensamento, sino el a radia esaki afo y algun hende a cuminza tuma nota di esaki.

   Di e forma aki, porta a habri pa el a bira y tuma puesto di Director di Instituto ImSan na San Nicolas.  E tabata un reto cu Drs. Rajnherc a tuma cu man habri, y el a probecha di esaki pa purba na uza tur ruta posibel pa Aruba ricibi un berdadero joya di clinica, cu a sigui expande, y ta awor e poderoso Centro Medico cu e ta awor.  Y pa mantene pueblo bon informa, cu gusto e tabata complace DIARIO cu entrevistanan.

   Hende di tur hende: Drs. Rajnherc tabatin e pensamento, cu si bo empleadonan ta feliz y contento cu e trabao, cu nan trato pa tur pashent lo ta excelente tambe.  Y na ImSan, ta tur empleado conoce nan director Drs. Rajnherc personalmente!  Nan hasta conoce su casa Sandra, miho conoci como Sandy.

   Algo cu hopi hende lo corda di dje, ta e forma cariñoso pa papia cu tur hende, y su pasenshi pa sinta scucha tur hende pa asina mesora trata na introduci cambio, drecha algo, of bay traha riba un plan.

   Danki na su push constant, ImSan a logra haya aparatonan di radiologia cu a bira e prome na Aruba, y asina pashentnan no mester a bay Colombia of otro paisnan den region pa ricibi tratamento.  Aki Aruba a spaar placa, y pashentnan por sigui haya tratamento cu lo ultimo den tecnologia, y cada dia nan ta sigui pasa cu nan famia localmente mes.  Hasta tabatin plan pa cuminza acepta pashentnan di exterior pa bin tuma tratamento aki.

   Empuhe pa Ambulance: Director Drs. Rajnherc tabata mira constant e necesidad di training di personal di Ambulance cu ta cay bao di ImSan, como tambe e upgrade y renobacion di e unidadnan di Ambulance cu nan tin mester di dje.

   Di e forma ey cada rato cu logra yega na e fondo necesario, hunto cu Gobierno y tambe AZV ta logra busca unidadnan di Ambulance.  Momentonan di orguyo ora cu tin ceremonia di introduccion di e unidadnan nobo di Ambulance cu ta yega Aruba.  Y ademas con ta splica cu pa casualidad a haya via di Corsou un contact cu otro compania pa por a bay cumpra unidadnan di Ambulance mas grandi.

   Acreditacion JCI: Algo cu e Director Drs. Rajnherc tabata hopi orguyoso di dje, ta e hecho cu ImSan a logra haya na 2023 e seyo di ‘Control di Calidad’, y totalmente acredita pa e prestigioso entidad internacional di Joint Commission International (JCI).

   Director di ImSan, Drs. Joel Rajnherc a indica cu e tempo ey, cu e etapa cu nan a logra aki, ta un testament di e trabao duro di tur hende, incuyendo e dedicacion, e espirito di colabora, cu ta sigui pusha nan bay dilanti.  Hunto tur hende na ImSan a logra sobrepasa retonan, a celebra exitonan, y continuamente a sigui enbusca di excelencia den e trabao.  Danki na e esfuerzonan combina aki cu e dedicacion enfoca, cu nan por ta orguyoso di loke a wordo logra.  DIARIO tabata presente e tempo ey, ora cu e Director di ImSan a gradici e empleadonan pa nan pasion, nan ideanan innovativo, y sosten continuo.  E acreditacion di JCI, ta danki na e team cu tin na ImSan.  Y e ta sigur cu nan lo sigui logra mucho mas etapa y exito nan dilanti.

   Trato na empleadonan: Di hopi tempo por a tende con grandi e aprecio di empleadonan di ImSan ta pa cu nan director Drs. Rajnherc.  E ta un profesional kende semper ta exigi e mihor prestacion di cada uno di nan, pero pa nan keda mantene e toke humano.  Tur esnan trahando na ImSan tabata entusiasma cada biaha cu e visionnan cu Drs. Rajnherc tin pa keda expande ImSan cu servicionan cu ta yuda comunidad grandemente sin cu tin bay busca asistencia medico den exterior.

   Dos aña pasa ora cu ImSan a celebra su di 19 aniversario, pa celebra ‘Dia di ImSan”, a organiza un evento pa tur empleado, den forma di un ‘Scavenger Hunt’ cu a pasa door di cayanan di San Nicolas.  E dia ey, Director Drs. Joel Rajnherc a indica cu e ta hopi orguyoso di henter staf y personal, pasobra “nan ta ofreciendo bon servicio na henter pueblo”.

   Esey ta e motibo tambe cu a mira un tipo leve di exodus di empleadonan di Hospital cu a bandona nan empleo anterior, y a bay traha na ImSan.  Hopi plannan cu a ser presenta riba mesa, a cristaliza y comberti den realidad.  Salanan di operacion cu lo ultimo den tecnologia.  E servicio di Docternan di Wowo tabata conta cu e aparatonan di mas moderno, unda e specialista ta setup cada uno uzando sea computer of un tablet.

   Sigur multitud di empleado, ex-colega, oficialnan di diferente instancia, pashentnan lo ta tristo cu e informe di su morto.  Palabra di condolencia na su casa Sandy, su yiu muhe Sam kende tambe ta siguiendo estudio medico, y su yiu homber Riven.