DIMP ta cobra placa di impuesto, deposit’e pa gobierno y esaki ta dicidi con ta aloca esaki

Meverly Romano, vocero:

ORANJESTAD (AAN) -- Meverly Romano, Relacionista Publico di Departamento di Impuesto (DIMP),  a splica cu DIMP ta ehecuta e Ley di Vehiculonan di Motor, y ta encarga pa cobra e placa tambe, ta deposit’e riba cuenta di gobierno, cual ta dicidi con ta aloca esaki. Y mesun procedimento ta sosode cu tur otro placa di impuesto cu mester bay pa gobierno.

“Pero e placa ta wordo deposita riba cuenta di Gobierno, y gobierno ta e instancia encarga di aloca e fondonan aki, conforme su presupuesto.

Kiermen, na un manera crioyo papia, DIMP no ta drecha caminda. DIMP ta cobra e placa pa gobierno, y gobierno ta dicidi con e ta uza e placa”, Meverly Romano a señala.

El a agrega cu ta manera BAZV cu e placa cu DIMP ta cobra ta bay directamente pa AZV pasobra e tin un destinacion. Mesun cos ta pasa, por ehemplo cu AOV, AWV, DIMP ta cobra e primanan aki pero e tin un destinacion cu ta bay pa SVb.

“Den e caso di belasting riba vehiculonan di motor, e ta bay den e fondo general di gobierno, dus, gobierno ta haya e placa y e ta dicidi conforme su presupuesto, con e ta aloca e fondonan aki. Kiermen, DIMP no ta cobra e placa di belasting riba vehiculo di motor y duna DOW p’e bay drecha tur e camindanan. Gobierno ta dicidi riba esey”, Meverly Romano, Relacionista Publico di Departamento di Impuesto a remarca.