Diasabra anochi a gara automobilista moviendo 170 km/h

Riba Green Corridor

ORANJESTAD (AAN): Den fin di siman cu a pasa, Polisnan di Warda di Santa Cruz a dicidi na tene un control general, dirigi riba velocidad halto.

   Nan a bay haci esaki pa mira si tur hende ta respeta e velocidad maximo di 80 km/h riba Green Corridor.

   Polisnan a bay para na diferente puntonan strategico y cu cooperacion di Unidad Motorisa a tene e accion di e control.

   Resultado: Segun vocero di Polis, e anochi aki un total di 112 boet a wordo reparti na automobilistanan cu tabatin nan pia demasiado pisa ta primi e trot.

   Vocero Liliana Rasmijn a confirma na DIARIO, cu e velocidad mas halto cu Polis a detecta cu nan radar, ta di un automobilista coriendo 170 km/h.  El a wordo para, y a haya su boet.  Chens ta grandi cu e tin di bay aparece dilanti Hues, cu riesgo di perde su rijbewijs.  Esey tin di wordo dicidi door di Ministerio Publico.

   Detencion:  Polis a indica u nan a haci dos detencion tambe durante e control.  Autoridad a confirma, cu e prome detencion tabata di un menor di edad cu tabata manehando e vehiculo di motor. E di dos detencion tabata pa maneha un vehiculo di motor bao influencia di alcohol.

   Polis a adverti cu e controlnan lo sigui y e meta principal ta pa concientiza loke ta e seguridad den trafico. Percura pa bo papelnan ta na ordo y si bo ta bebe no stuur. Busca bo amigo responsabel.