Diaranson di 22 januari 2025 lo tin sentencia den caso Flamingo

Hues a laga sa despues di tratamento di e caso

ORANJESTAD (AAN): Despues di 6 dia di tratamento di e caso Flamingo, ayera a atende e ultimo parti cu tabata e reaccion di e dos Fiscalnan riba e defensa di e abogadonan y e reaccion di e abogadonan riba loke e Fiscalnan a trece padilanti.

   Despues di esey tabatin e parti caminda cada un di e sospechosonan ta haci uso di nan derecho di ultimo palabra.

OTRO AÑA TIN SENTENCIA

   Despues cu e sospechosonan a hiba palabra, Hues a bisa cu mirando e magnitud di e caso, otro aña 21 januari 2025, pa 8.30 di mainta e lo cera tratamento di e caso. Hues a sigui bisa cu su siguiente dia, 22 januari 2025 pa 1.30 di merdia, e lo dicta sentencia. El a bisa cu e lo bay ta presente den sala di Corte di Husticia di Aruba.

   Tratamento di caso Flamingo, tabatin dianan cu ta te den oranan di atardi ta keda cla cu tur e informacionnan cu Hues, Fiscal, abogadonan y e sospechosonan ta bisa durante tratamento. Tabatin momentonan emocionante.

            Un di e momentonan tabata ora cu e dama Wever a bisa cu wowo yen di awa, cu e caso penal aki a causa cu awor e ta den divorcio y cu lo mester bay bende e cas. Un otro momento tabata ora cu Otmar na yoramento a bisa Hues con e caso aki a caba cu ne. Un otro momento tabata siman pasa ora abogado mr. Emerencia a bisa cu Esser su ruman a fayece recien y por a mira cu Esser tabata afecta pa esaki.