The content originally appeared on:
Diario
ORANJESTAD (AAN) — Apertura di Aña Parlamentario, den Sala di Parlamento, a tuma lugar Diamars na un forma breve.
Pero pafo di Parlamento, e marcha uniforma pa ricibi Su Excelencia Gobernador, un biaha mas tabata sublime, cumpliendo cu un bunita protocol manera semper ta e caso.
Pa recapitula, manera ta conoci, despues cu Dialuna cu a pasa, a tuma lugar den Sala di Parlamento e eleccion di Presidente y Vicepresidente di Staten pa e periodo 2024-2025, unda cu señor Raymond Kamperveen a resulta electo como Presidente y señor Hendrik Tevreden como Vicepresidente, e noticia a circula cu Gabinete Wever-Croes a cay. E circunstancia aki a trece cu ne un proceso totalmente otro na locual pueblo di Aruba ta custumbra cu ne, y tambe un apertura di Aña Parlamentario, den un esfera distinto, cu un Gobierno demisionario.
Awo lo spera pa dia 6 di December pueblo presenta na urnanan electoral pa elegi un Parlamento nobo y formacion di un Gabinete Nobo, bao gran expectativa cu no tabata previsto pa comunidad ainda. Dia 18 di October tin entregamento di lista di e partidonan cu lo participa den e contienda, mientras cu e campaña politico a cuminsa caba.
Gobernador Alfonso Boekhoudt a tene su discurso, den cual el a destaca e funcion di Parlamento como e Organo mas halto den nos Estado di Derecho, y a trece dilanti varios punto di locual ta spera pa e siguiente gobernacion. El a elogia elogia e sistema democratico di Aruba, na unda no tin persecusion politico, ni un pueblo cu mester emigra pa busca oportunidad di sobrevivencia pafo di nan patria, manera ta e caso di diferente pais, actualmente.
Presidente nobo di Parlamento, señor Kamperveen tambe a hiba palabra y a expresa palabranan di gradicimento pa tur esnan cu tabata presente, durante e ceremonia di apertura aki di Aña Parlamentario.
