Diabierna 28 di Maart ta ultimo dia cu por entrega peticion pa vergunning pa campamento

Vocero policial Liliana Rasmijn ta informa:

ORANJESTAD (AAN) Vocero Policial, señora Liliana Rasmijn, den entrevista cu DIARIO a declara, cu e kier a cuminza informa cu diabierna 28 di Maart awo, ta ultimo dia cu por entrega peticion pa vergunning pa campamento.

   El a informa tambe cu e temporada di campamento ta cuminza Diadomingo 13 di April, despues di 12’or y ta caba dia 27 di April.

  “Manera semper nos ta haci un apelacion pa mesun bon cu bo ta bin set up tur bo cosnan, e ultimo dia tambe cu bo ta campando, ruim up tambe tur bo cosnan pa ora bay cas laga e lugar limpi”, Rasmijn a bisa.

   Pa loke ta e areanan, esnan cu a haya e peticion, e departamento den distrito di Noord, ta esun cu lo informa e personanan aki y ora ey nan lo sa na tempo, na unda mas nan lo por bay haci peticion pa mag di campa. El a subraya cu den cada distrito nan tin nan manera di traha.

   “Nos ta djis corda bo, por ehemplo si bo ta di ex-Bushiri of Linear Park, corda cu ta na Playa. Corda si ta na parti di Noord, ranchonan, corda cu ta na Distrito di Noord bo ta haci peticion; pasobra hopi biaha nan ta bin na e distrito cu no mester. Pues, na unda cu bo ta bay campa eynan bo ta entrega bo peticion”, Liliana Rasmijn a señala.

   Rasmijn a agrega cu caminda cu no por campa, di mes e publico lo wordo avisa. E persona cu ta bin cu e peticion e persona cu ta tum’e ta check e di biaha, y ta bisa bo kico ta posibel y kico no, y eynan ta duna bo opcion. El a reitera cu contal cu entrega e peticion prome cu dia 28 di Maart awo.